R achegará a súa visión sobre a transformación das empresas en GaliciaTIC
mércores, 14 de outubro do 2020
A
operadora galega R, unha das patrocinadoras do evento GaliciaTIC,
participa este xoves no histórico foro galego de novas tecnoloxías
que comeza este mércores 14 de outubro, segundo lembra a compañía
de telecomunicacións “unha cita obrigada para as empresas
tecnolóxicas” e na que, máis ca nunca, poderemos coñecer
recursos e ideas para “remontar a crise sanitaria” e “revalidar
a idea da necesidade incuestionábel de transformar dixitalmente as
nosas empresas”. Concretamente, R participará mañá na mesa
temática virtual Empresa conectada: do produto ao servizo
dixital. Alberto Díaz, por parte da operadora, conversará na
mesa con Bernardo Riveira, de Cinfo e con Óscar Fafián, de Cruz
Vermella.
Neste
contexto, Alberto Díaz Freire, responsábel de Alianzas, IoT e
Transformación Dixital de R, ofrecerá a súa visión sobre o
proceso de transformación dixital das empresas, unha realidade que
se acelerou coa chegada da pandemia e que obriga aos negocios a
traballar para sacar o máximo partido destas evolucións: “Estamos
ante unha nova realidade na que produtos e servizos van ser cada vez
e necesariamente máis dixitais e intelixentes”, avanza Alberto
Díaz, engadindo que no estado de cousas que nos vai tocar vivir
“todo está e todo estará conectado”.