R apoiará ás empresas galegas na integración de tecnoloxías de Intelixencia Artificial

luns, 8 de xuño do 2020 S. P.

A operadora galega R vén de dar un novo e importante en paso na súa vertente de apoio á innovación empresarial e ao emprendemento, unha liña de traballo que ten achegado fitos tan relevantes como a aceleradora de proxectos DiCo Challenge. Agora, a través da área Empresas, a operadora (e todo o grupo Euskatel do que forma parte) incorporou un equipo especializado en Intelixencia Artificial para apoiar as empresas galegas na aplicación de ferramentas smart. Trátase da iniciativa BAI Analytics, que desenvolverá un grupo de expertos en IA co obxectivo de aumentar a competitividade do noso sector.
BAI Analytics porá o foco en satisfacer a que, en palabras de R, constitúe unha das principais necesidades das organizacións empresariais: obter valor e manter a súa competitividade mediante o uso das últimas ferramentas e técnicas de datos a un prezo accesíbel. Respecto do grupo de expertos que dará apoio, xorde para “cubrir as necesidades comerciais, tecnolóxicas e científicas desta nova capacidade nas empresas, achegando experiencia e coñecemento das mellores prácticas na construción, posta en marcha e xestión de análises sofisticadas co obxectivo de incrementar os ingresos das empresas clientes, aumentar a súa eficiencia, mellorar a experiencia co cliente e xestionar eficazmente o risco da organización”.
Segundo explicou a operadora galega, nos últimos anos a Intelixencia Artificial (IA) abriu novos camiños á hora de mellorar modelos operativos empresariais, aínda que, en xeral, a un custe elevado de máis para o groso dos negocios. Porén, a compañía constata unha tendencia a converter estes recursos en máis accesíbeis economicamente, con contribucións tecnolóxicas cada vez máis democráticas e con capacidade para facer avanzar a actividade dunha manchea de organizacións, que poden “construír e despregar a súa IA de forma segura, rápida en rendíbel”. Neste senso, R recoñece o seu interese por lograr o máximo espallamento posíbel das tecnoloxías intelixentes no tecido galego, “comezando por facelo internamente”. Para iso, explica, BAI Analytics está a desenvolver solucións de xeito interno con vistas a que a súa experiencia sirva de exemplo para os clientes.
Para Isidro Fernández de la Calle, director de Empresas de R e do Grupo Euskaltel, “o que diferenciará os gañadores e perdedores agora non son os mellores científicos de datos ou os mellores datos, ou mesmo a tecnoloxía máis sofisticada, senón a capacidade de aproveitar estas tecnoloxías da mellor maneira para resolver un maior número de problemas que lles dean os maiores impactos nas súas contas de resultados. Por esta razón creamos unha nova iniciativa centrada en Intelixencia Artificial”.
BAI Analytics basease a súa actividade na seguinte premisa: é posíbel obter grandes resultados para o negocio a través dunha aplicación correcta de casos de uso ou mesmo aplicando casos de uso xa existentes, con este tipo de tecnoloxía.

PUBLICIDADE