Redegal, finalista nos premios eAwards México 2016
xoves, 14 de abril do 2016
A axencia galega Redegal,
centrada no desenvolvemento de servizos de comercio electrónico e
mercadotecnia, está de celebración. De
feito, vén de ser nomeada finalista nos galardóns eAwards México
2016, dentro da categoría Mellor Axencia Dixital de Captación de
Tráfico. Segundo informa a empresa, ter resultado finalista do
devandito certame é “xa de por si un importante recoñecemento”,
e máis tendo en conta que Redegal chegou á recta final dos premios
incluída nunha das categorías máis importantes e onde maior
competencia se dá entre participantes. “Trátase”, sinalan, “dun
recoñecemento ao traballo de todo o equipo”. Segundo engaden, o
éxito foi posíbel grazas ao apoio e traballo do resto de
departamentos que configuran Redegal, “non só en España, senón
tamén no resto dos países nos que estamos presentes, México e
Colombia”.
Seguindo co fío das
actividades a desenvolver alén do Atlántico, sinalar que a compañía
de raizame galega vai participar un ano máis nunha das feiras de
ecommerce e mercadotecnia dixital máis importantes de España e
Latinoamérica, de cara “a crear sinerxías entre empresas e
países”. Falamos da Feira
eShow, que desenvolve estes días 19 e 20 de abril a súa edición
mexicana, na capital DF. Dende Redegal anuncian novidades para
este evento, entre elas unha nova caseta que se poderá descubrir o
día de apertura de portas do encontro, o 19 de abril. Alén disto, o
CTO México da axencia galega, Jesús Rodríguez, realizará un dos
relatorios programados para a tarde do 20 de abril.
Por último, dicir que
dende Redegal fan
un chamamento aos interesados en opinar quen merece levar o premio
dos eAwards México 2016. Lembrar que a empresa galega estende o
seu traballo dende España até México ou Colombia, onde tamén
están presentes e fan posíbel que o deseño, planificación e
execución de estratexias personalizadas de posicionamento en tempo
real en Google se traduza en que os seus clientes superen os billóns
de impresións mensuais e os millóns de clics diarios.