Resident Evil Village fixa o seu lanzamento o 7 de maio

O xogo Resident Evil 7: Biohazard terá unha secuela directa o vindeiro 7 de maio, segundo veñen de anunciar no Resident Evil Showcase, onde tamén confirmaron que Village terá versión para PC, PS4, PS5, Xbox One e Xbox Series X|S, coa vantaxe de que os que adquiran o título para consolas da anterior xeración poderán gozar do xogo nas novas consolas.

Village chegará en varias versións que xa poden reservarse en varias tendas físicas e dixitais, destacando o feito de que a versión para PlayStation 5 conta xa con Maiden, unha demo visual, que non permitirá gozar do xogo no rol do seu protagonista, Ethan Winders, senón que permitirá que o xogador se introduza na pel da doncela¸ quen terá que fuxir do castelo Dimitrescu sen loitar nin bloquear ataques, o que supón unha experiencia independente do xogo principal, na que poderemos coñecer unha breve historia ambientada no mundo de Village, así como explorar o castelo no que terá a acción do xogo principal, aínda que nunha época diferente.

Re:Verse

Capcom tamén deu a coñecer Resident Evil Re:Verse, un novo título multixogador que permitirá manexar aos personaxes máis representativos do universo de Resident Evil, que poderán enfrontarse en grupos de entre 4 e 6 xogadores.
Para conseguir unha experiencia frenética, os enfrontamento en Re:Verse durarán uns 5 minutos, e como detalle diferencial temos que cada vez que o noso personaxe morra, converterase nun zombi, podendo vingarse de quen o sacou da partida.
Este xogo estará dispoñible para Xbox One, PS4 e PC (Steam) e será retrocompatible coas novas consolas. Os usuarios que adquiran Village poderán gozar deste título de balde, pois Capcom enténdeo como un xeito de celebrar os 25 anos de Resident Evil.