Roberto Zompi anima aos desenvolvedores galegos a sumar forzas na alianza GENIVI

Roberto Zompi, á dereita, acompañado do noso empresario e activista open source Roberto Brenlla

Roberto Zompi achegou este venres no congreso LibreCon un dos relatorios máis agardados do programa de actividades do devandito evento de software libre e negocios. Zompi, un dos grandes expertos na aplicación do software para o desenvolvemento de coches intelixentes e conectados, falou no congreso compostelán do gran reto da industria TIC con respecto ao sector do motor: acompasar o seu ritmo de desenvolvemento (funcionalidades, aplicacións, electrónica) ao ritmo adoptado en materia de innovación pola industria do automóbil. En parte para isto, explicou, púxose en marcha a alianza mundial GENIVI, da que Zompi é vicepresidente. Dela desvelou múltiples detalles, animando aos presentes no congreso a adherirse á comunidade, e máis tendo en conta “o carácter referencial de GENIVI na estandarización de recursos de fontes abertas no ámbito do motor”.
Dende o principio, dixo, ten que quedar claro que non todo pode estandarizarse, ou sexa, estabilizarse en fonte aberta ao servizo da comunidade. Porén, si que hai unha boa parte de elementos con potencial de ser e presentarse como open source. Segundo fixo saber o relator, determinar cales son susceptibles de seren estandarizados para poñelos logo a disposición da colectividade é outro dos cometidos de GENIVI, unha alianza de organizacións e entidades que contribúen con achegas abertas para completar e abastecer a cadea de valor dos fabricantes de automóbiles en materia electrónica.
En GENIVI, dixo, participan grandes e pequenas empresas, cada unha contribuíndo con partes de maior ou menor envergadura, pero todas elas importantes (todos son elos da mesma cadea), cubrindo no seu conxunto e nas súas partes todas as normas regulamentarias e requirimentos da Unión Europea (non todo é seguro ou rendible, segundo a UE). Na plataforma hai múltiples pólas e ámbitos de traballo: dende grupos de expertos en media e gráficos a grupos específicos de conectividade, networking, aplicacións, toma de decisións, mercadotecnia, etc.
Amais do devandito, Zompi levou aos presentes a un percorrido exhaustivo pola arquitectura de GENIVI, unha estrutura complexa que define o alicerce de cumprimento normativo. Lembrou que non todos os recursos que a organización pon ao alcance da man da industria e consumidores o mesmo nivel de estandarización. Ao respecto disto, unha boa parte do traballo de GENIVI diríxese a determinar cales elementos cumpren cun mínimo de esixencias para dispoñibilizarse en open source. “Cando se guinda un novo compoñente ao mercado”, dixo, “debemos enxergar se ese compoñente é susceptible de ser acubillado na nosa arquitectura, porque está claro que non todo o que se subministra cumpre con determinados requirimentos e esta vertente non empregable debe rexeitarse”. Zompi sinalou que se ben non teñen resposta dende a alianza para o emprego de programas de fonte pechada, si que é certo que existe a capacidade dentro da organización para achegar alternativas. Sobre a base do que si que pode resultar útil, GENIVI adícase tamén a certificar elementos e avalalos, dixo. “Con isto”, explicou, “abrimos a porta a compañías e entidades que se ben non forman parte da nosa alianza, pasan a formar parte colaboradoras”.
Zompi lembrou que en Magneti Marelli “somo precursores da máxima de levar cousas da teoría á realidade”. A idea, en boa medida, era “demostrar que con código de natureza aberta, alleo ou creado por nós, podíamos chegar a ter importantes taxas de crecemento e de éxito, para nós e para os demais, para Magnetti Marelli para os membros de GENIVI”, sinalou. Ao fío disto, animou aos presentes a integrarse na organización e visualizar os seus traballos e os seus enxeños.
O relator
Roberto Zompi é xerente de Enxeñaría Avanzada na multinacional de compoñentes e sistemas de alta tecnoloxía para o automóbil Magneti Marelli, pertencente ao Grupo Fiat Chrysler, histórico propietario de marcas do prestixio de Ferrari, Lancia, Alfa Romeo e Maserati. É tamén vicepresidente de GENIVI Alliance, un consorcio que promove a aplicación de software de código aberto no eido do motor.