Salceda presenta un proxecto para subir no carro das TIC ao comercio local
xoves, 28 de setembro do 2017
O Concello
de Salceda de Caselas deu a coñecer onte unha iniciativa
dirixida a espallar o coñecemento e as habilidades tecnolóxicas
entre o tecido económico da vila e a súa contorna. Máis polo
miúdo, encamíñase a dinamizar o comercio minorista mediante a
integración, no seu seo, de ferramentas innovadoras e medios
telemáticos. Trátase
de Salceda Dixital e vén da man da Concellería de Comercio e
Formación que dirixe a edil Loli Castiñeira. O proxecto quere
achegar vantaxes e beneficios aos comerciantes e autónomos locais
que desexen ter presenza na Internet e, incrementar e mellorar, deste
xeito, a súa comunicación cos clientes, as súas redes de
distribución, a súa xestión e, por suposto, a súa visibilidade.
A través del forneceráselles de formación en
novas tecnoloxías, ferramentas informáticas e asesoramento e
titorías personalizadas. Con este fin, debullaranse de maneira
gradual as diferentes metodoloxías e ferramentas dispoñíbeis
(Google My Business, Google+, Facebook, Twitter e Instagram, etc) a
día de hoxe para acadar “unha boa presenza na Internet” , captar
clientes novos e facilitar a interacción cos que se teñen.
Tal e como sinalaba a concelleira Loli Castiñeira
na presentación desta ferramenta, “trátase dun proxecto pioneiro
en toda Galicia que xunto co equipo de técnicos do CDL poñemos a
disposición dos nosos comercios para facilitarlles o acceso ás
novas tecnoloxías, abríndolles un magnífico eido de difusión e
captación de clientela que non sempre é suficientemente
aproveitado, e ao que os nosos comerciantes poden sacarlle un enorme
partido”.
O proxecto está na súa integridade subvencionado
polo Concello de Salceda de Caselas, a través das Concellarías de
Comercio, Emprego e Formación. As persoas interesadas poden
inscribirse no
Facebook do CDL O Torrón ou na súa páxina web coa única
condición de ter un negocio ou comercio activo en Salceda, e estar
dado de alta no réxime da Seguridade Social en Autónomos.