Scio IT achega unha innovadora plataforma para simplificar a xestión de inmóbeis: GEMA FM
luns, 10 de outubro do 2016
A empresa tecnolóxica
galega Scio IT (SCIO Innovation
Technologies) achega dende hai máis dunha década (dende A Coruña)
importantes desenvolvementos e solucións baseadas nas máis
avanzadas tecnoloxías da información. Sen ir máis lonxe, é
unha das impulsoras dunha iniciativa da que falamos recentemente en
Código Cero, o proxecto Smarnet, que se dirixe a modernizar ao
máximo a nosa pesca, engadindo de xeito natural metodoloxías smart
e dando forma a unha plataforma de servizos orientada ás actividades
produtivas do noso litoral. Entre o amplo catálogo de tecnoloxías e
servizos de Scio IT atópase tamén a ferramenta GEMA
Facility Management, encamiñada a simplificar a xestión e o mantemento de
inmóbeis (permitindo aforros importantes de tempo e diñeiro e
apostando por facelo de maneira “sinxela e intuitiva”). A
plataforma, nun plano máis detallado, contribúe a normalizar os
procesos e comunicacións e garante a calidade dos servizos
inmobiliarios prestados.
Entre as vantaxes de
empregar GEMA FM atópanse as seguintes: é accesíbel (permitindo
obter todo o rendemento de seu dende calquera emprazamento), é
multiplataforma (é posíbel empregar GEMA FM a través de calquera
dispositivo, dende PC a dispositivos intelixentes pasando por
tabletas), é adaptábel e evolucionábel (a plataforma está
deseñada de maneira modular, permitindo que cada módulo traballe de
maneira independente e relacionada), é sinxelo (en palabras de Scio
IT “pon as máis modernas tecnolóxicas ao servizo da sinxeleza e
da produtividade”) e é seguro (cada usuario só accede á
información relativa ao seu perfil e función). Ademais, salienta
por ter ás súas costas un servizo de atención personalizada,
técnico, con amplitude de horarios e sen tempos de espera.
Segundo informa Scio IT,
GEMA permite detectar e cubrir novas necesidades de servizos,
adaptando a contorna de traballo á nova situación e incrementando
ao mesmo tempo a satisfacción dos empregados da organización, que
son agora tratados como clientes internos. Ademais, engade a empresa,
“resulta decisivo sobre o que é o segundo apartado de custos das
empresas, polo que a súa implantación non só mellora a xestión,
senón que xera aforros que poden alcanzar máis dun 20%”.
A finalidade de GEMA,
conclúe Scio IT, “é achegar unhas funcionalidades que ofrezan un
servizo axeitado e satisfactorio aos usuarios, e á vez proporcionar
un significativo aforro de tempo e diñeiro ás organizacións”.