Simyo estrea fibra a 1 Gbps

O operador Simyo vén de anunciar a mellora da velocidade da súa oferta de fibra óptica, que pasa de 600 Mbps a 1 Gbps, o que supón a reestruturación das súas tarifas, xa que seguen a manter as vellas velocidades, de xeito que permiten a contratación de fibra a 300 Mbps, 600 Mbps e 1 Gbps a 25,99, 27,99 e 29,99 euros/mes respectivamente, prezos que poden reducirse en 4 euros de contratar algunha das tarifas móbiles de Simyo que custen como mínimo 11 euros/mes. Amais, quen aínda tivese contratada fibra a 500 Mbps pasará a gozar de 600 Mbps sen incremento de prezo.
Lembremos que este operador funciona con cobertura de Orange (é a súa marca low cost), carece de cota de alta, non cobra instalación para os usuarios que manteñan o seu contrato un mínimo de 3 meses e non inclúen teléfono fixo.