SkyShowtime chegará a España o día 28

Tras meses agardando a chegada a España de Paramount+, Sky e Paramount anunciaron que finalmente abordarían o mercado europeo como SkyShowtime, plataforma que en setembro xa chegou a países como Dinamarca, Finlandia, Noruega e Suecia, e hoxe confirmaron que o vindeiro día 28 estrearán o seu servizo en España e Andorra.
Este lanzamento parece chegar nun momento complicado para as plataformas de streaming, cun mercado demasiado saturado, de aí que a subscrición do servizo (para ata 3 dispositivos simultáneos en Full HD), que será de 5,99 euros/mes, contará cunha promoción de 2,99 euros/mes, prezo reducido dabondo para que haxa usuarios que se animen a probar esta plataforma (na liña da promoción de lanzamento de HBO Max) que chega a España da man dos seus primeiros SkyShowtime Originals en español: Bosé e Los Enviados.
SkyShowtime tamén ofrecerá series como Halo, Star Trek: Strange New Worlds, The Offer, Tulsa King ou Vampire Academy, ás que sumaranse filmes de franquías como Fast & Furious, Gru, Misión Imposible, Parque Xurásico ou Star Trek. No caso español, SkyShowtime contará coa estrea da segunda tempada da serie Por H o Por B.
O servizo funcionará a través da web ou de aplicacións para Android, iOS, tvOS e Android TV, así como en televisores de LG e Samsung.