SmartPEME móstranos como mellorar as nosas comunicacións en liña e o noso traballo de mercadotecnia

A Deputación de Pontevedra, a través da rede de capacitación tecnolóxica SmartPEME, ofrece esta semana do 13 ao 17 de marzo seis novas accións formativas, enmarcadas na súa carteira de obradoiros en liña. As accións tratarán temas como a suplantación de identidade, o acoso por razón de xénero na empresa, a creación de campañas de mercadotecnia por correo electrónico, a posta en marcha de blogs, a emisión de eventos en liña e o funcionamento de WhatsApp Business.
Os obradoiros darán comezo este luns 13 de marzo ás 10.00 da maña. Manuel Freire, experto universitario en Robótica, Programación e Impresión 3D, será o encargado de impartir a formación Ciberseguridade, Ramsonware e suplantación de identidade, a través da cal explicarase en que consiste este ciberataque que está crecendo en popularidade e adopta múltiples formas.
O martes 14, en horario de tarde e vía Zoom, será a quenda da acción Xestión do acoso por razón de xénero na empresa, centrada na importancia de elaborar un protocolo de acoso e cales son as obrigas empresariais ao respecto. Neste obradoiro, a cargo da graduada en Relacións Laborais e Recursos humanos pola Universidade de Vigo, María José Márquez, proporcionaranse os coñecementos necesarios para identificar os tipos de acoso existentes.
O mércores haberá dobre sesión. Na queda da mañá, as 12.00 horas, Fátima Faílde licenciada en Publicidade e Relacións Públicas, achegará o obradoiro Crea unha campaña de e-mail márketing con MailChimp, para dar a coñecer esta ferramenta gratuíta a través dun percorrido sinxelo polas súas seccións e aprender a crear listas de bases de datos, deseñar formularios e redactar boletíns.
Na quenda da tarde, ás 17.00 horas, celebrarase o curso Como crear o teu blog turístico no que Patricia Cabaleiro, posgraduada en Turismo, contará os beneficios desta ferramenta, dando a coñecer o proceso de creación dun blog desde cero, ideas para os posts e aspectos a ter en conta para escribir nel.
O remate de semana tamén contará con dous obradoiros. O xoves 16 ás 11 da mañá, Manuel Freire volverá a impartir unha formación, neste caso Como emitir o teu evento en liña de xeito profesional ll, no que explicará como mellorar os eventos en liña que se levan a cabo cos clientes e a difusión de contido. Finalmente pola tarde, ás 18.00 horas, celebrarase Así funciona WhatsApp Business, impartido polo enxeñeiro informático José Luís Taboada, que dará a coñecer esta ferramenta coa que as empresas e negocios poden interactuar cos seus clientes dunha forma sinxela e profesional.