Starlink abandonará a súa beta en outubro

Dende SpaceX levan anos traballando na creación dunha constelación de satélites de baixa altura para prover de servizos de acceso á Internet de banda larga e baixa latencia, e tras varios meses de probas, Starlink sairá en outubro da súa beta, converténdose nun servizo oficial que presume de estar a piques de conseguir unha cobertura case global.
Durante o actual período de probas aseguran que as conexións de Starlink conseguen velocidades de entre 50 e 150 Mbps e unha latencia de entre 20 e 40 milisegundos (aínda que das probas rexistradas dende Ookla no segundo trimestre de 2021 en Francia despréndense velocidades de descarga de 139,39 Mbps, de subida de 29,35 Mbps e unha latencia de 53 milisegundos), prometendo melloras de conectividade no futuro, aínda que tamén advirten que durante o despregamento desta rede de satélites haberá breves momentos nos que podería perderse a conectividade totalmente.
Para poder gozar deste servizo, para o que actualmente hai un bo número de usuarios en lista de agarda, é preciso facerse cun kit de antena parabólica, router Wi-Fi, fonte de alimentación, cables e trípode de montaxe, podendo o propio usuario realizar a instalación coa axuda dunha aplicación móbil. Este lote de instalación ten un prezo de 499 euros ao que habería que engadir os portes, mentres que o servizo está previsto que teña un prezo de 99 euros/mes, polo que estamos ante unha solución para quen queira gozar dunha conexión comparable á dun ADSL, pero en territorios aos que non chega nin a fibra óptica nin banda larga móbil, podendo converterse na solución ideal para certos enclaves rurais.
A grande vantaxe de Starlink sobre anteriores conexións de satélite é que estes satélites están 60 veces máis preto da Terra, polo que conseguen unha latencia moi inferior, conseguindo dar o servizo unicamente vía satélite cunhas condicións moi semellantes ás da banda larga ordinaria (aínda que a prezos superiores).