Tecnoloxía Bluetooth (e galega) para felicitar o Nadal no centro Ponte Vella de Ourense

O Centro Comercial Ponte Vella de Ourense vén de botar man da imaxinación para facer uso do móbil co fin de estar un pouco máis preto dos clientes nestas datas. Isto vai ser posible grazas á ferramenta Wilico, co que o dito centro poderalles enviar ós seus clientes un vídeo de felicitación de Nadal amais da programación de actividades que terán lugar no recinto ó longo destas festas.
As mensaxes, que chegarán previa autorización dos clientes mediante tecnoloxía Bluetooth, forman parte dunha campaña multimedia desenvolvida pola produtora galega Dyr Producións Audiovisuais, con sede no Parque Tecnolóxico de Galicia (Ourense), en colaboración cunha empresa barcelonesa.
A ferramenta empregada polo centro comercial ourensán, denominada Wilico, detectará de xeito automático a presenza de móbiles, axendas electrónicas ou outros dispositivos equipados con Bluetooth ou infravermellos e emitirá unha solución de permiso para enviar a información. Unha vez recibida a autorización por parte do cliente, este recibirá os contidos adaptados ó tipo de soporte co que conta asegurando unha boa compatibilidade entre o emisor e o receptor. Trátase dun novo xeito de publicidade non convencional pioneiro en Ourense e pensado para chegar ó cliente dun modo diferente.