Telefónica deberá pagar 6 millóns de euros por incluír compromisos de permanencia en Movistar Fusión

A Comisión Nacional dos Mercados e a Competencia (CNMC) sancionou a Telefónica con 6 millóns de euros por incumprimento dos compromisos adquiridos tras a adquisición de DTS en 2015, en concreto unha das ofertas empaquetadas, Movistar Fusión, que incluía o arrendamento dun smartphone con compromiso de permanencia.
Os compromisos de Telefónica, vixentes inicialmente ata abril de 2020, foron prorrogados en xullo de 2020 por un período adicional de 3 anos, e entre os mesmos figuraba que Telefónica non podería aplicar aos seus clientes de televisión de pagamento condicións ou prácticas que fosen un atranco para a súa mobilidade, como serían os compromisos de permanencia para os clientes.
A CNMC asegura que os produtos de Movistar Fusión dende o seu lanzamento o 11 de abril de 2021 incluían compromisos de permanencia para os clientes de 36 meses, con penalización por baixa anticipada, polo que a oferta comercial de Fusión con smartphone restrinxía a capacidade dos clientes de contratar servizos semellantes con competidores de Telefónica, incumprindo as condicións que debía cumprir Telefónica por ter mercado a compañía audiovisual DTS, de aí que impoñan unha sanción de 6 millóns de euros á compañía (que aínda pode presentar recurso contencioso-administrativo ante a Audiencia Nacional).