Telefónica e Gradiant presentan no MWC o seu proxecto de entrega de paquetes con drons 5G

A operadora Telefónica fixou para este martes 28 de febreiro, nun marco tan concorrido como o do Mobile World Congress de Barcelona, a presentación dun proxecto de seu, desenvolvido polo Centro Tecnolóxico Gradiant (con sede en Vigo), para a entrega de envíos a través de drons con 5G. A iniciativa, pioneira en España, ten como alicerce unha fonda análise das posibilidades do dito estándar móbil: de como a rede 5G pode facilitar o desenvolvemento e implantación de servizos con vehículos aéreos non tripulados en contornas urbanas, por exemplo o envío de paquetes e subministros.
Para iso, Telefónica contou coa colaboración do centro galego Gradiant no desenvolvemento do sistema intelixente de comunicacións cooperativas, na implementación da solución que permite ofrecer localizacións precisas e na integración destas tecnoloxías nos drons e elementos intelixentes das Cidades Intelixentes. Tamén participou o fabricante de dispositivos Ericsson, que ofrece a rede móbil actualmente en modo comercial sobre a que se desenvolve este proxecto, e Genasys, empresa especializada en LBS (servizos baseados en xeolocalización) e comunicacións críticas de emerxencia.
Caso de uso
O caso de uso, presentado recentemente na sede central de Telefónica en Madrid, consiste no voo de varios drons que se comunican entre si e con diferentes elementos urbanos conectados, co obxectivo de facer unha correcta entrega dun paquete nun punto de recollida móbil, atopando na súa traxectoria outro vehículo aéreo de semellantes características ou un aviso dunha área de voo restrinxido. Telefónica explica que o desenvolvemento deste proxecto foi “fundamental” a implicación de Correos, que é “pioneira na exploración de novas solucións para o transporte de mercadorías con drons, para chegar a zonas de difícil acceso ou mesmo prestar novos servizos”, engadiron fontes da operadora.
Coa finalidade de facer posible este piloto foi necesario combinar varias tecnoloxías, como a 5G, as comunicacións C-V2X, a tecnoloxía RTK e a localización móbil. “A tecnoloxía 5G, coa súa baixa latencia e gran largura de banda, é clave para o desenvolvemento de casos de uso baseados en drons, xa que as baixas latencias resultan decisivas para poder establecer unha comunicación en tempo real e a cooperación entre drons, e entre drons e obxectos conectados”, explican Telefónica e Gradiant, que, no caso da tecnoloxía C-V2X, lembran que se trata dunha empregada nos coches conectados que neste caso concreto facilitou a capacidade de interacción do dron coa súa contorna mediante mensaxes de curto alcance, comunicándose coa Smart City para poder reaccionar de maneira intelixente ás condicións cambiantes da devandita contorna.
Pola súa banda a tecnoloxía RTK (Real Time Kinematic ou navegación cinética satelital en tempo real) ofrece localizacións precisas con marxes de erro de centímetros, “algo fundamental para determinadas situacións coma a aterraxe de drons nas caixas de correos móbiles”, sinalan.
Ao devandito súmase o servizo de localización 5G, que ofrece información sobre a localización e unha estimación da distancia do vehículo aéreo á antena. Este servizo exponse como unha segunda fonte de posicionamento independente para contrastar a posición calculada con GNSS, garantindo a integridade do posicionamento.