Todo o que quixemos saber sobre os fundamentos en xestión de proxectos, nun novo curso de Vitae

Vivimos tempos incertos, asediados por crises diversas que afectan directamente ás empresas. A nivel de traballo, todo o que se faga por aumentar a efectividade, sacar o máximo rendemento aos recursos cos que contamos e optimizar a xestión manteranos por forza no bo camiño. Isto é aplicable a calquera empresa de calquera sector, pero especialmente importante no sector TIC. “Utilizar as boas prácticas na xestión de proxectos achéganos certidume no desenvolvemento de proxectos, axudando a que a planificación sexa máis realista e detallada e o seguimento e control máis ordenado, o que sempre resultará beneficioso para acadar os resultados previstos”, explican dende a consultora Vitae, que organizan este mes de marzo, en formato de aula virtual, o curso Fundamentos en Xestión de Proxectos. Serán 15 horas de formación a celebrar os días 13, 16, 20, 23 e 27 de marzo.
Sobre os beneficios desta nova actividade formativa, a consultora galega Vitae engade que “os procesos directivos existentes, os documentos recomendados e as ferramentas e técnicas dispoñibles axudarán ao director do proxecto e ao seu equipo a aportar unha visión a longo prazo do proxecto e a materializalo de maneira máis coherente e sistemática”.
Os obxectivos concretos do curso son os seguintes:
-Coñecer as boas prácticas de dirección de proxectos internacionalmente recoñecidas.
-Coñecer o vocabulario específico da disciplina, o cal tamén é internacionalmente recoñecido.
-Definir o ciclo de vida dun proxecto e determinar os procesos directivos en base ao seu tamaño, complexidade, incerteza e natureza.
-Coñecer as ferramentas máis axeitadas para o seguimento e control do proxecto, así como os informes que poden xerarse.
O curso está dirixido a profesionais que estean participando na xestión de proxectos dende diferentes roles, estean familiarizados sobre fundamentos de boas prácticas e queiran afianzar coñecementos e adquirir outros novos, que les axuden a ter unha percepción global do ciclo de vida dun proxecto, as súas fases e as ferramentas e técnicas recomendadas.
A persoa encargada de impartir os contidos será Isaac Olalla Del Real, licenciado en Dereito (Universidade Complutense de Madrid) amais de ser un profesional certificado co PMP e co PMI-RMP por parte do Project Management Institute. Trátase dun experto en xestión de iniciativas innovadoras, con máis de 15 anos de experiencia neste ámbito e preto dunha década como formador, impartindo cursos de xestión baseada na metodoloxía PMI. Polas súas actividades de adestramento xa pasaron máis de dous milleiros de persoas, formándose en xestión dunha PMO, en xestión de riscos e en xestión avanzada de proxectos. Ten traballado para Telefónica, Vodafone, Deloitte, IECISA, BT, a DXT, Bankinter, FedEx, o Ministerio de Industria, Votorantim, OHL ou a Xunta de Galicia.