USC e UVigo desenvolven un xogo xacobeo para mellorar a aprendizaxe da fonética inglesa

Persoal investigador da USC e da UVigo acaban de desenvolver un xogo serio ambientando no Camiño de Santiago que facilita aos seus potenciais participantes mellorar a aprendizaxe da fonética e pronuncia da lingua inglesa. Segundo informaron as dúas entidades académicas, o traballo contou coa colaboración de profesionais de moi distintas áreas, por exemplo a agrupación musical Luar na Lubre que, de xeito altruísta, cedeu cortes da súa obra Vieiras e vieiros: historias de peregrinos como banda sonora. Do mesmo xeito, contouse coa colaboración desinteresada do grupo Resonet.
O proxecto ten o obxectivo engadido de mellorar a comprensión da dita lingua a través dos seus acentos e as súas correspondencias entre conceptos, imaxes, sons, grafías e símbolos fonéticos. Ao mesmo tempo, achega coñecemento sobre o Camiño. Poderá usarse nas aulas en dispositivos móbiles e tamén como material aberto ao público en xeral.
Coordinado pola catedrática da USC, Mª de los Ángeles Gómez, e polo profesor da UVigo, Alfonso Lago, este traballo é un dos resultados dun proxecto de investigación financiado polo Ministerio de Ciencia, Innovación y Universidades (na modalidade de Proyectos de I+D+i Retos de Investigación 2019), no que tamén participaron o estudante da UVigo Ánxel Fragueiro, así como investigadores da Universidad Internacional de La Rioja (UNIR), a UNED, a Universidad de Málaga e o Centro de Supercomputación de Galicia (CESGA). O proxecto conta coa colaboración do University College of London (Speech Hearing and Phonetic Siences Dept), e tamén de Arasaac (Centro Aragonés para la Comunicación Aumentativa y Alternativa).
Este xogo serio está constituído por 34 etapas do Camiño Francés, dende Sant Jean Pied du Port ata Santiago de Compostela. Para avanzar polo Camiño é necesario que cada xogador ou xogadora afronte os retos que lle permitan alcanzar as competencias de percepción, produción e transcrición no ámbito da fonética e pronuncia inglesas. Nos retos os usuarios terán a axuda de peregrinas e peregrinos que fixeron o camiño, ben no pasado ou no presente, incluíndo participantes na campaña Las Estrellas del Camino, que accederon a participar e aparecen ao longo do xogo a medida que se percorre o Camiño Francés, ademais dunha avatar ficticia, Patience, que lle servirá de guía dos contidos.
A presentación do xogo tivo lugar na Facultade de Filoloxía da USC coincidindo coa celebración da sexta edición do Taller Internacional da análise do discurso de Santiago de Compostela, IWODA 22, unha cita na que participaron 22 relatores/as e máis de 200 asistentes de institucións educativas de 23 países baixo o lema Tecnoloxías Dixitais e Gaming: Implicacións e Aplicacións para o uso da lingua, a ensinanza e a aprendizaxe.