Unha versión preliminar de GTA IV contén trazas dun modo zombis

Un kit de desenvolvemento de Xbox 360 adquirido por apenas 5 dólares nun mercadiño de segunda man en Edimburgo converteuse nun achado de grande relevancia para a preservación de videoxogos xa que no seu interior gardaba unha versión preliminar de Grand Theft Auto IV datada en novembro de 2007, é dicir, poucos meses antes do lanzamento oficial do título de Rockstar.
O dispositivo, identificado como un modelo Xbox 360 XDK destinado a estudios de desenvolvemento, pertencera previamente a Rockstar North, como evidencian tanto a etiqueta externa como o software instalado (Xshell, exclusivo para devkits). O disco duro de 120 GB incluía unicamente esta versión anticipada do xogo, o que facilitou a súa identificación e análise.
A filtración, difundida a través do foro GTAForums, supón un dos maiores volcados de información dentro da comunidade coñecida como GTA IV Beta Hunt, centrada en reconstruír contidos descartados do xogo. Entre os elementos máis destacados atopados nesta compilación figuran restos dun sistema de ferris plenamente funcional, visible en tráilers previos ao lanzamento pero finalmente inutilizable na versión comercial. Tamén se detectaron cambios substanciais nas emisoras de radio, con aproximadamente a metade da programación musical distinta respecto á edición final.
No apartado armamentístico, a versión inclúe unha pistola con silenciador e outras armas non utilizadas, acompañadas de animacións incompletas e elementos de son provisionais. Pola contra, non aparecen referencias ao revólver cuxos restos si foron documentados posteriormente por modders na versión definitiva. Ademais, identificáronse modelos preliminares de personaxes, incluída unha versión inicial de Michelle, cun acabado visual afastado do resultado final.
Un dos aspectos máis rechamantes desta versión é a presenza de indicios dun modo con zombis, un elemento que durante anos formou parte das especulacións arredor do desenvolvemento do xogo. Aínda que non existe confirmación oficial da súa implementación, o código inclúe referencias a camas hospitalarias asociadas a zombis, así como modelos e animacións iniciais destas criaturas.
A compilación non é completamente xogable, pero a comunidade xa iniciou os traballos para facela funcional. Esta descuberta supón un avance significativo para os esforzos de documentación histórica do desenvolvemento de Grand Theft Auto IV, unha tarefa que membros da comunidade levan máis dunha década impulsando.