Unha vintena de lucenses fórmanse no CEI Nodus no uso das TIC

A alcaldesa de Lugo, Lara Méndez, acompañada da edil de Desenvolvemento Local e Emprego, Ana Abelleira, mantivo un encontro cos 20 lucenses, de entre 26 e 68 anos, que están a participar no obradoiro LugoSostible 5.0, posto en marcha polo Executivo municipal e centrado principalmente nas TIC (Tecnoloxías da Información e a Comunicación).
Trátase da iniciativa coa que o Goberno local ofrece formación e experiencia profesional a persoas desempregadas de Lugo. A rexedora explicou que “esta nova acción formativa está orientada á creación de aplicacións e contidos enfocados na posta en valor do patrimonio histórico da cidade, así como do patrimonio cultural e natural do municipio”, ademais de aclarar que as áreas nas que se centra o curso “constitúen un importante nicho de mercado en continuo crecemento, polo que o obxectivo final é xerar novos postos de traballo na cidade”.
Durante a súa visita, Méndez entregou a cada alumno unha tableta coa que facilitar os labores de aprendizaxe. O obradoiro, que comezou o pasado mes de setembro, terá unha duración dun ano e os alumnos están retribuídos co salario mínimo interprofesional. Ademais, conta con fondos europeos e ofrece tres especialidades formativas: desenvolvemento de aplicacións con tecnoloxías web, desenvolvemento de produtos audiovisuais multimedia interactivos, e xestión de mercadotecnia e relacións públicas. As accións propostas contemplan a obtención do certificado de profesionalidade de Nivel 3 e os contidos son impartidos de forma presencial nas instalacións do CEI Nodus.