Unha xornada da AETG pon o foco nos tendidos aéreos de telecomunicacións no rural

O vindeiro venres 17 de marzo ás 12 horas a Asociación de Enxeñeiros de Telecomunicación de Galician organiza a xornada virtual Despregue de tendidos aéreos de telecomunicacións en núcleos rurais. Todo o que necesitas saber! Trátase dunha sesión divulgativa e capacitadora dirixida en boa medida a responsables de urbanismo, telecomunicacións e infraestruturas dos concellos galegos.
Terá formato en liña e, en palabras da AETG, desenvolverase baixo un enfoque áxil e resolutivo, botando luz sobre aspectos relativos á viabilidade do despregue de tendidos aéreos de telecomunicacións en núcleos rurais, cunha quenda de preguntas para formular dúbidas por parte dos asistentes. A xornada será impartida por Javier Fernández Fraga, enxeñeiro de Telecomunicación, experto na materia.
O evento está organizado pola AETG en colaboración coa Axencia para a Modernización Tecnolóxica de Galicia e será retransmitido vía streaming a través do Centro Gaiás Tech da Cidade da Cultura de Galicia.