WordPress estrea versión 3.5

martes, 11 de decembro do 2012 Marcus Fernández

A xestión de galerías é máis áxil na nova versión de WordPress

O xestor de contidos para blogs máis popular da Rede, WordPress, estrea hoxe a súa versión 3.5, alcumada Elvin na honra do batería Elvin Jones, que no seu día tocara xunto a John Coltrane e moitos outros. Esta actualización supón unha renovación importante do sistema de subida de fotografías e creación de galerías, así como a incorporación dun novo molde predeterminado (Twenty Twelve) que conta cun deseño moi limpo e optimizado para dispositivos móbiles que pode funcionar como base para moitos espazos web.
Os usuarios de pantallas Retina tamén agradecerán as melloras no panel de control de WordPress, que agora aproveita a resolución adicional de pantalla para amosar unhas iconas mellor definidas.
Outras novidades a destacar poden ser que as novas instalacións carecerán de xeito predeterminado do xestor de ligazóns, pois entenden que este tipo de elemento carece de sentido na web actual; unha nova páxina de benvida no menú de administración; unha nova tipografía Open Sans; mellor soporte de elementos incrustables (para facilitar a publicación de contidos de servizos como SlideShare.net e Instagram.com); e incluso a actualización das API TinyMCE, jQuery, jQuery UI, jCrop e SimplePie.

Vídeo de presentación da nova versión de WordPress

PUBLICIDADE