Xa é posible solicitar os bonos dixitais para a conectividade de colectivos vulnerables

A Sede Electrónica da Xunta de Galicia xa permite a tramitación de solicitudes para poder beneficiarse do bono dixital para a conectividade de colectivos vulnerables, que contribuirá ao financiamento da contratación de novos servizos de conexión de banda larga ou o incremento de velocidade dos xa contratados dende unha localización fixa.
Esta liña de axudas está orientada a unidades familiares identificadas como vulnerables e facilitará que a factura polo servizo achegado por unha das compañías de telecomunicacións colaboradoras se reduza en 20 euros/mes durante 12 meses. As conexións contratadas deben ter unha velocidade mínima de 30 Mbps, e as compañías que actualmente colaboran coa iniciativa son Telefónica, Vodafone, R, Itegal e A túa Xanela.
O bono dixital poderá beneficiar a persoas que xa sexan beneficiarias das prestacións públicas de renda de inclusión social de Galicia (Risga) ou do ingreso mínimo vital (IMV), estando tamén dispoñible para persoas cunha carencia grave de recursos económicos ou en risco de exclusión social (ou sexa, cando o nivel de renda na unidade familiar sexa 1,25 veces o IPREM se non hai unidade familiar ou menores na familia, ou 1,75 veces o IPREM se hai menores na unidade familiar).