Xa non é posible subscribirse a Twitter Blue

A estrea do novo Twitter Blue non parecía ter sido o suficientemente desastrosa, e a cantidade de contas falsas que contaban con selo de verificado para suplantar a celebridades e marcas disparouse dun xeito escandaloso, especialmente polo feito de que estas contas estaban a usarse para facer humor dun xeito que as marcas non están dispostas a tolerar, xa que provocan confusión e crear crises de reputación ante as que teñen que actuar.
Se ben pode resultar gracioso que unha falsa conta de Pepsi diga que é mellor a Coca-Cola, cando dende as contas falsas publican críticas políticas sobre os abusos das marcas ou chegan a dicir que unha farmacéutica dispensaría insulina de balde (obrigando á propia compañía a ter que lanzar un comunicado dicindo que esa información proviña dunha conta de Twitter falsa), non só os selos de verificación están a resultar prexudiciais e confusos, senón que está a mandarse un sinal de alarma aos anunciantes, que están a abandonar Twitter en desbandada, e mesmo as grandes axencias publicitarias están a recomendar aos seus clientes que conxelen os seus investimentos publicitarios en Twitter mentres non estea máis claro o rumbo da compañía.
O máis curioso do asunto é que, sen mediar ningún tipo de anuncio por parte de Twitter ou de Musk, o mecanismo para darse de alta en Twitter Blue dende iOS deixou de funcionar, no que semella unha medida de contención para evitar que continúe a proliferación de contas falsas de marcas que poidan lucir o selo de verificado e provocar un caos que dá a entender que Twititer non é un espazo de confianza.
Resulta imposible saber o que está a pasar en Twitter, e como estará a plataforma social a semana que vén, de aí que non sorprenda a desconfianza dos anunciantes, dos traballadores da empresa que deixan os seus postos ante a posibilidade de que os consideren legalmente responsables das imprudencias que están a cometer baixo o ritmo acelerado que impón Musk, e incluso dos usuarios, que ven como periga o sistema e exploran alternativas. Por fortuna, na meirande parte dos casos os usuarios non atopan en Mastodon unha alternativa real a Twitter, polo que a plataforma social de Elon Musk aínda non padeceu unha fuxida de usuarios que poida tomarse en serio.