A Aula CeMIT de Ribeira achega novos cursos tecnolóxicos durante abril e maio

O concelleiro Francisco Suárez-Puerta presentou este martes 26 de marzo, xunto ao concelleiro Fernando Abraldes, os cursos que terán lugar na Aula CEMIT de Ribeira durante os vindeiros meses de abril e maio: cursos todos eles dirixidos a acadar a plena dixitalización da cidadanía.
Estas actividades formativas están dirixidas a aquelas persoas que precisen “facer xestións coas administracións de xeito telemático e máis fluído, e mellorar o seu uso dos teléfonos móbiles e computadores”, segundo explicou o concelleiro de Novas Tecnoloxías.
O primeiro curso, Sede electrónica - certificado dixital, celebrarase do 8 ao 11 de abril os luns, martes, mércores e xoves en horario de 9:30 a 11:00. O curso de Móbil Android básico, do 8 ao 11 de abril, realizarase os luns, martes, mércores e xoves de 11:30 a 13:00.
Pola súa banda, Ofimática con Libreoffice, celebrarase do 8 de abril ao 22 de maio, en horario de 16:30 a 18:00. “Este curso de nivel medio está destinado a persoas que xa teñen certo coñecemento no uso de Office”, explicou Suárez-Puerta. Ademais, a actividade formativa Competencias básicas dixitais desenvolverase entre o 15 de abril e o 20 de maio, os luns e mércores de 9:30 a 11:00, e por último, un curso máis específico de Ferramentas de Google, celebrarase do 15 de abril ao 29 de abril os luns e mércores de 11:30 a 13:00.
As inscricións poderanse facer a través do correo electrónico cemit.ribeira@xunta.gal ou ben no teléfono 981876043.