A Aula TIC PEME organiza a novena edición do seu obradoiro en liña sobre xestión de relación cos clientes
mércores, 11 de maio do 2016
Este mes a Aula TIC PEME
da Universidade de Santiago (Campus de Lugo) vai organizar en datas
vindeiras a novena edición do seu Taller
Virtual sobre Xestión de Relación con Clientes con vTigerCRM. O
obxectivo principal da Aula é seguir dando respostas formativas
acaídas para o alumnado en materia de comunicación empresarial con
clientes, “dada a gran aceptación que tivo a última convocatoria
do curso”. O obradoiro diríxese sobre todo a PEME e autónomos,
pero poderá cursalo calquera persoa interesada nestes ámbitos
profesionais CRM. Trátase, coma nas anteriores edicións, dun taller
cen por cen virtual, con contido baseado en vídeo titorías e
actividades prácticas. Celebrarase entre o 20 de maio e o 30 de xuño
deste ano.
O custe do obradoiro é
de cincuenta euros, aínda que os alumnos e ex-alumnos da
Universidade de Santiago terán á súa disposición un desconto do
50% no devandito importe (ao que cómpre engadir descontos grupais
para grupos de 5 persoas). Para inscribirnos temos
que encher o formulario correspondente habilitado pola Aula.
Respecto do miolo do
curso, sinalar que durante o desenvolvemento do taller empregarase a
aplicación web de software libre vTigerCRM. Ademais doutras
temáticas, o programa do obradoiro inclúe contidos sobre
instalación e posta en marcha da aplicación vTigerCRM,
familiarización coa contorna, manipulación dos rexistros (contactos
e empresas), proceso de venda e post-venda, xestión de inventario,
campañas de mercadotecnia, análise de datos, configuración do
administrador e posta en marcha do portal do consumidor.
No que atinxe á
metodoloxía elixida, lembrar que se trata dun obradoiro
“eminentemente práctico”, baseado en software libre e de código
aberto. Impartirase integramente de forma virtual a través dun
espazo virtual habilitado para tal efecto. Cada semana proporanse
unha serie de materiais compostos principalmente por vídeo-titorías
explicativas das temáticas devanditas, de tal maneira que cada
participante deberá revisar os materiais facilitados e completar as
tarefas semanais para comprobar cal é o grao de aproveitamento dos
módulos. Devanditos materiais atópanse totalmente actualizados á
última versión de vTigerCRM dispoñíbel nestes intres (6.4.0).
Sinalar tamén que cada
un dos participantes terá asignado un/a titor/a con a finalidade de
que a atención sexa “o máis personalizada posíbel”. Doutra
banda, o alumnado poderá facer uso de dous tipos de titorías: en
tempo real (un día á semana fixarase un horario de atención en
tempo real a través dun chat) e en tempo diferido (existirá un foro
onde cada participante poderá presentar as súas dúbidas ou
consultas, de tal forma que sexan resoltas polo titor/a nun prazo
máximo de 48 horas).