A Factoría de Innovación de Galicia achegará excelencia en I+D para as nosas empresas
martes, 13 de decembro do 2011
O
Consorcio da Zona Franca de Vigo, conxuntamente coa Escola de
Organización Industrial (EOI) e a Universidade de Vigo, vén de
acordar
a posta en marcha da primeira Factoría de Innovación de Galicia.
Este centro de I+D, impulsado co obxectivo de favorecer a
competitividade nas empresas e máis a comunicación e colaboración
universidade-investigadores-sector privado, funcionará como un
centro de excelencia xerador de plans de adestramento
individualizados para contribuír ao medre e bo funcionamento das
nosas empresas, amais da súa participación en proxectos
innovadores.
A
Factoría da Innovación segue o ronsel doutras experiencias
semellantes postas en marcha a nivel internacional e estatal, onde se
teñen consolidado como espazos de alto rendemento en creatividade
aplicada á innovación. Na sinatura do convenio entre os devanditos
impulsores da iniciativa, interveu María Teresa Pisano, delegada do
Estado, quen sinalou que o Consorcio está convencido de que é
preciso reinventar a xestión empresarial para asegurar a
supervivencia das pequenas e medianas empresas, “e aínda que en
Vigo pódense percibir de xeito constante mostras da gran capacidade
de creatividade que teñen empresas e investigadores para desenvolver
novos produtos e servizos, iniciativas como esta son precisas para
acadar o éxito empresarial”, dixo.
No
acto tamén falou Alfonso González, director da Escola de
Organización Industrial, quen fixo fincapé no importante apoio que
pode significar a Factoría en relación ao noso tecido económico e
empresarial, apoiando a calquera iniciativa de mercado a través de
múltiples eidos de actividade: innovación, planificación,
asesoramento, colaboración, adestramento, etc.
A
Factoría terá a súa sede física no Porto do Molle e contará cun
orzamento de 300.000 euros. Este espazo de interacción comezará a
materializar a súa actividade cunha primeira fase na que dúas
ducias de empresas seleccionadas da contorna de Vigo terán a
oportunidade de propoñer os seus problemas e necesidades para
mellorar a súa competitividade. A EOI contribuirá na execución
deste centro mediante o deseño de actividades, a súa dirección e a
execución. O Consorcio, amais de achegar o espazo físico para o
emprazamento da Factoría, realizará a escolma das dúas ducias de
empresas devanditas, xunto coa EOI, cousa no que tamén colaborará a
Universidade de Vigo.