A UCGAL advirte de que Amazon non é quen de cumprir prazos de envío
xoves, 26 de novembro do 2015
Amazon, o xigante do
comercio electrónico, semella que non é quen de facer chegar os
pedidos dentro dos prazos estipulados antes da compra dun produto dos
seus catálogos. Así
nolo lembra estes días a Unión de Consumidores de Galicia, UCGAL,
que vén de emitir un comunicado advertindo sobre un problema xeral
(os posíbeis adiamentos nos nosos pedidos con motivo da celebración
do Black
Friday, a festa das rebaixas e descontos que adoita abrir a
campaña de Nadal) e un problema máis concreto (os adiamentos de
Amazon). En palabras da plataforma galega, “cómpre advertir aos
clientes e usuarios de Amazon España, sobre todo tendo en conta a
proximidade dunha data tan sinalada como o Black Friday, que poñan
especial atención ós prazos de entrega dos pedidos que promete a
compañía, e que son vinculantes”.
A organización galega
sinala que tivo ocasión de comprobar ela mesma o incumprimento, por
parte de Amazon, das condicións determinadas dun envío do servizo
Premium, un servizo de pago. E detalla, a maiores, como un asociado
da UCGAL mercou onte 25 de novembro un produto no portal da dita
compañía facendo uso da súa conta Premium, un produto que se
acompañaba dunha data de entrega garantida, segundo o primeiro aviso
da empresa, para o día seguinte. “Porén”, informa a UCGAL,
“menos de oito minutos máis tarde o noso asociado recibiu o aviso
de que a entrega se realizaría posíbelmente un día máis tarde”.
Para a organización galega, tendo en conta este exemplo concreto,
Amazon “non só incumpriu as súas condicións de envío senón que
tamén vulnerou os dereitos da persoa consumidora”. Isto, engadido
ao feito estarmos preto da celebración do Black Friday, “data na
que pedidos e vendas no comercio electrónico dispáranse
especialmente”, leva á UCGAL a “dubidar seriamente” da
capacidade de Amazon para cumprir co que ofrece en materia de envíos.
A organización lembra no comunicado que está a disposición de
todas aquelas persoas que sexan vítimas de situacións como a
devandita.