A compañía Xerpo converte ao protagonista de A Metamorfose de Kafka nun programador atafegado pola tecnoloxía
venres, 27 de novembro do 2015
Os tempos van cambiando
pero o home e os seus medos seguen sendo semellantes. Cambian a forma
e os escenarios, pero a orixe do problema segue a ser en boa medida a
mesma. No libro A Metaformose de Kafka, a obra orixinal, o
protagonista empregaba demasiado tempo de si mesmo en illarse dos
demais, probablemente porque tampouco se lle ofrecían moitas
alternativas. Mais, que pasaría se o argumento da novela estivese
ambientado nos nosos días? Para Xerpo,
a compañía teatral residente na Sala Ingrávida (O Porriño),
ben puidera acontecer que Gregor Samsa, o protagonista da novela de
Kafka, fose unha persoa literalmente abafada polas novas tecnoloxías. Nisto consiste en parte
a volta que o grupo de teatro lle vén de dar á Metamorfose,
unha revisión en clave TIC que se presenta cun epígrafe que fala
por si so (Cara a onde chegaremos coa tecnoloxía?) e que se estrea o
vindeiro día 4 de decembro na devandita sala do Porriño, ás 21.30
horas.
Segundo nos contan dende
Xerpo, se ben o espectáculo está inspirado no clásico de Kafka, “o
noso Gregor é un programador pechado na súa casa que preocupa á
súa contorna familiar e laboral”. E engaden: “O protagonista
está emprazado nunha contorna futura que en certa maneira non variou
moito da orixinal, o mundo segue igual e el, coma os grandes e
descoñecidos xenios, traballa nun proxecto que pode cambiar a
concepción que o ser humano ten da vida”.
Máis en detalle, na
proposta do grupo do Porriño, Samsa é un programador informático
que traballa para unha empresa que abusa dos seus servizos, é “un
mileurista” do que depende toda a súa familia e que, no seu tempo
de lecer, centra os seus esforzos nunha ambiciosa e innovadora
tecnoloxía: un emulador do pensamento humano que sobre o papel tería
a capacidade de reproducir o pensamento do ser humano, dunha persoa
concreta. Porén, a arela de concretar este traballo unido á falta
de orzamentos, levan a Gregor a cometer unha imprudencia: a probar a
tecnoloxía en si mesmo. Para quen queira albiscar un pouco máis da
proposta de Xerpo, sinalar que
o grupo habilitou en Vimeo un inquedante vídeo de promoción: