A galega Alcatraz ponse á fronte do sector TIC especializado en cumprimento normativo
venres, 9 de decembro do 2011
A
empresa galega Alcatraz
Solutions, con sedes na Coruña e en Madrid, vén de facer reconto
do acadado ao longo do ano en materia de ampliacións das súas
dependencias e de facturacións. A firma, especializada en
cumprimento normativo e en protección do coñecemento (axudando ás
empresas e organizacións a respectar a Lei Orgánica de Protección
de Datos, LOPD), centra unha boa parte da súa actividade en achegar
ferramentas software avanzadas desenvolvidas baixo o selo LOPDGEST,
parte de Alcatraz.
Os
obxectivos da empresa galega, que xa factura 600.000 euros e espera
acadar o millón no ano vindeiro, pasan por encher os ocos de
información e manobra que teñen unha boa cantidade de organizacións
e entidades en materia de regulamento dos datos, un regulamento, o da
devandita Lei, que marca unha serie de límites para o emprego da
información persoal. Isto, sinala Alcatraz, aféctalles a tódalas
empresas do Estado, xa que, en maior ou menor medida, todas manexan
datos de natureza persoal de persoas físicas: clientes, provedores,
empregados, colaboradores, accionistas, etc.
Alcatraz,
que segundo os seus recentes informes manexa xa a cuarta parte da
cota do mercado, foi posta en marcha por Leopoldo Mallo, fundador e
actual director xeral da empresa, que xa ten máis de dúas décadas
de experiencia dirixindo equipos, sobre todo de software e de
distribución internacional de alimentos. Segundo nos conta Mallo,
estamos ante unha empresa que en “pouco máis de seis anos
logrou converterse en referente nacional para o sector, capaz de
consolidarse e conseguir beneficios ano tras ano e medrar, incluso en
termos laborais, nestes intres de crise”.
Alcatraz,
que conta cunha rede de 500 socios de negocio emprazados en todo o
territorio nacional, achega en compañía destes partners “un
catálogo de servizos e solucións para a adaptación á normativa en
materia de protección de datos que permiten avaliar e reducir os
riscos sen necesidade de ser un experto legal ou un especialistas
informático”. As devanditas solucións diríxense a todo tipo
de clientes: pequenas e medianas empresas, comunidades de
propietarios, grandes empresas, administracións públicas,
tecnoloxía de computación na nube, etc. “Todo isto”,
engádese dende a compañía galega, “deu como resultado unha
facturación de 600.000 euros neste ano e o espallamento do negocio,
coa incorporación de novas ferramentas, xunto coa ampliación das
instalacións na Coruña, que permitirán que o seu actual equipo
humano, composto por 12 profesionais, se duplique no vindeiro
exercicio, coa posibilidade de incrementar nun 30% máis o teito
laboral”.
Entre
estas novas ferramentas inclúense as seguintes:
·
AUDITGEST É unha solución de computación na nube para as
auditorías en protección de datos. Está cen por cen automatizada e
verifica o cumprimento do tratamento ou almacenamento de información
persoal das distintas entidades responsables.
·
BACKUPGEST. Permite a dispoñibilidade dos datos en calquera lugar e
intre. Baseado en computación na nube, posibilita unha rápida
recuperación da información, adaptación a diferentes contornos,
flexibilidade, eliminación de investimentos e cumprimento das
normativas legais.
·
RECOVERYGEST. Co obxectivo de asegurar a información das empresas,
Alcatraz Solutions pon a disposición das empresas e profesionais un
servizo que permite establecer un protocolo de actuación fronte a
posíbeis desastres informáticos. Cobre tódalas perdas de datos,
asegurando a recuperación dos mesmos nun 98% dos casos.