As tecnoloxías de última xeración, polo miúdo hoxe no Gaiás da man de Telefónica

Telefónica organiza hoxe na Cidade da Cultura un debate sobre futuros materiais e tecnoloxías nas que poder centrar a súa actividade as nosas empresas. Cousas como por exemplo o grafeno (para moitos especialistas o material protagonista da seguinte revolución tecnolóxica), a impresión en 3D ou a robótica colaborativa ao servizo da produtividade. Estes e outros son os eixes temáticos das Xornadas de Industria Conectada 4.0 Tecnoloxías dixitais con impacto na industria (programa en PDF), organizadas por Telefónica, e que se celebran este 14 de xaneiro na sala Eisenman do Centro de Emprendemento da Cidade da Cultura de Galicia (Santiago de Compostela).
O encontro, ao que acudirán un centenar de representantes de empresas e centros tecnolóxicos galegos, será inaugurado por Manuel Varela, director da Axencia Galega de Innovación (GAIN), e Manuel Ángel Alonso, director de Telefónica en Galicia, e o seu obxectivo é “analizar a aplicación das tecnoloxías de última xeración na industria e valorar como están a transformar non só o modelo de negocio senón a forma de traballar nesta contorna”.
O núcleo da xornada estrutúrase en catro mesas de traballo dirixidas por expertos de prestixio neste tipo de tecnoloxías. Michael Loughlin, director de Nelmia Robotic Insight, coordinará a de robótica colaborativa e o seu impacto na produtividade; Javier Soria, de Telefónica Dixital Identity & Privacy, a de ciberseguridade e mecanismos de protección de datos en sistemas de información interconectados; Amaia Zurutuza, directora científica en Graphenea, experta en investigación e aplicación en grafeno, coordinará a adicada a este material; e Carlos Merchán, deseñador industrial de I+D de Telefónica, tutelará o debate sobre a aplicación da impresión 3D nos procesos produtivos.
O encontro arrincará previamente con dous relatorios maxistrais. Por unha banda, Tecnoloxías disruptivas na Industria 4.0, a cargo de Hugo Scagnetti, xerente de M2M de Telefónica España, que centrará a atención nas múltiples tecnoloxías que están a transformar o ecosistema empresarial. Por outro, no relatorio O papel da Experiencia de Usuario no Modelo de Empresa Dixital, Alberto Barreiro, director de Experiencia do Grupo Prisa, falará sobre como toda a planificación e estratexia da empresa dixital diríxese agora cara á figura do usuario e a súa experiencia na contorna en liña.