GaliciaTIC convoca o 19 de outubro ao sector galego das novas tecnoloxías
martes, 2 de outubro do 2012
Segue adiante,
malia o acontecido nos últimos anos na economía e malia o que está vindo, un
dos encontros tecnolóxicos de meirande experiencia da nosa terra: GaliciaTIC. A edición 2012 desta xuntanza
profesional, dirixida a procurar novos xeitos de colaborarmos arredor da causa
común da innovación ligada ao coñecemento, celébrase o vindeiro 19 de outubro,
no Centro Social Nova Caixa Galicia de Vigo. GaliciaTIC, que vai pola súa décima
entrega, contará este ano coa presenza activa de empresas galegas de primeira
liña, como por exemplo Imatia ou Edisa.
A primeira
participará unha vez máis como patrocinadora, achegando a maiores contidos ao
programa de actividades. Por exemplo a presentación Citizen developers, os usuarios ao poder, que virá da man do
director xeral da empresa, Fernando Vázquez. Tamén organizará o obradoiro Como crear de xeito doado aplicacións de
negocio, que será impartido por Alejandro Ricart, director da Unidade de
Negocio de I+D de Imatia.
Polo que atinxe a
Edisa, cóntanos a propia firma con sede en Vigo que amais do labor de
patrocinio, colaborará nunha das mesas redondas, “trasladando a experiencia de Edisa sobre o desenvolvemento de solucións
de xestión empresarial e o reto que supón o desenvolvemento de software estándar
de xestión adaptado a distintos mercados internacionais”. Asemade, a
empresa fará referencia ás principais tendencias a nivel tecnolóxico no
referente ás aplicacións de xestión empresarial.
A nivel máis xenérico,
a edición 2012 de GaliciaTIC enfocarase sobre todo a amosar as últimas innovacións
relacionadas coa mobilidade (NFC, RFID), o almacenamento virtual (computación
na nube), a seguridade, a xestión (management, BI, BPM), a produtividade no
desenvolvemento de software e a contribución aos novos xeitos de vida e
comportamento social (redes sociais, cidades intelixentes: smart cities, etc).