Modernización dálle pulo a eAdministración nos concellos galegos
martes, 6 de xullo do 2010
Cun presuposto que
ascende a nada menos que a 9 millóns de euros, a Secretaría Xeral de
Modernización e Innovación Tecnolóxica vén de anunciar que, coa aprobación da
iniciativa eConcellos, vai modernizar
a relación presencial das entidades locais coa cidadanía así como facilitar o
uso dos servizos telemáticos destas administracións por parte dos cidadáns.
Esta
iniciativa, que a secretaria xeral, Mar Pereira, presentou durante unha xornada
sobre o desenvolvemento da eAdministración nos concellos (organizada polo Club
financieiro de Vigo), tén como obxectivo simplificar e mellorar os circuitos de
rexistro das administracións locais e sobre todo, sentar as bases dun “desenvolvemento coordinado e sostible da
eAdministración” nas entidades locais.
Mar Pereira
sinalou que a modernización da Administración enmárcase nas liñas de actuación
de 2014.gal Axenda Dixital de Galicia, a estratexia tecnolóxica da Xunta coa
que, co pulo das novas tecnoloxías, busca converter Galicia “nunha Comunidade cohesionada social e
territorialmente, situada na senda da creación de emprego e crecemento
económico sostible e na que se posibilite o traballo en rede, o acceso ao
coñecemento, e a participación activa de todos os axentes implicados”.
Asemade, a
secretaria xeral sinalou que a modernización dos concellos no ámbito
tecnolóxico é un dos eixos fundamentais da aposta do Goberno galego no impulso
da administración electrónica en Galicia, xa que pola súa proximidade á
cidadanía as entidades locais deben ser un importante prestador de servizos
sociais.
Un dos
primeiros pasos para modernizar a relación coa cidadanía previstos na
iniciativa eConcellos é, segundo
indicou a titular da carteira de Modernización, “a creación das oficinas de atención presencial ao cidadán da Xunta de
Galicia, que actuarán como puntos de libre acceso e uso equipados cos medios
precisos para que os usuarios poidan realizar os trámites administrativos de
xeito telemático”.
Pereira tamén
anunciou que a Xunta elaborará un catálogo de a lo menos 85 procedementos
telemáticos para ofertar aos concellos galegos, dos cales se irán implantando
paseniñamente os que mellor conveñan, comezando cun mínimo de 10 procedementos
en 105 concellos.
Tamén se porá a
disposición dos concellos a adaptación e cesión dos sistemas de licitación e
facturación electrónica da Xunta para ser usados polas entidades locais e
potenciar o uso da Plataforma de Contratación de Galicia e do Rexistro Xeral de
Contratistas polos concellos.
Por outra
banda, e xa de cara ao vindeiro ano, a iniciativa e Concellos redefinirá o modelo de rexistro do Portelo Único, existente ata agora, establecendo unha integración
efectiva do rexistros públicos dixitais das entidades locais para evitar a ralentización
na recepción da documentación e posterior tramitación. Este proceso de
modernización suporá a dotación de equipamento aos 315 concellos e ás 4
deputacións provinciais de Galicia, cun investimento aproximado de 2 millóns de
euros.
Por último,
dentro das expectativas deste organismo, tamén se inclúe o afianzamento do espazo dixital EidoLocal como o portal das
entidades locais, potenciando os seus contidos e que o seu uso se consolide na
vida diaria municipal. A web disporá dun apartado privado que baixo o epígrafe,
Carpeta do Concello, permitirá que cada
municipio xestione a súa relación coa Xunta así como dun espazo destinado aos
servizos de apoio aos concellos e dunha xanela única da relación de servizos
prestados polas entidades locais.