O CITIC achega unha innovadora solución de rede para o control dos aparellos do fogar
mércores, 19 de outubro do 2011
- Exterior do centro de investigación TIC con sede no Campus da Coruña
O CITIC
da Universidade da Coruña segue a coller velocidade no que a
proxectos, encontros e actividades diversas arredor da investigación
en novas tecnoloxías da información se refire. Ás accións
desenvolvidas recentemente no seu seo para impulsar a
óptima xestión de iniciativas TIC e de programas
informáticos, cómpre sumar outras liñas de traballo máis
estendidas no tempo e con resultados palpábeis. Estamos a falar da
súa solución de rede sobre Fibra Óptima Polimérica para favorecer
o que se podería considerar un novo paso evolutivo dos fogares
intelixentes. O CITIC, que é un centro de investigación TIC
dependente da Universidade da Coruña, colabora no proxecto coa
empresa suíza Casacom AG, sendo
o papel do centro galego o de desenvolver a parte referente á
programación, cun software de control intelixente que estará
integrado nos sistemas de rede de fibra óptica para o fogar
deseñados pola devandita empresa centroeuropea.
Máis polo miúdo, o software do CITIC estará
integrado nos sistemas de rede para o fogar da serie Henson
da firma suíza. Así nolo fai saber estes días o centro galego con
motivo da recente visita ás súas instalacións no Campus da Coruña
dos representantes de Casacom: Oscar Rechou, fundador e director
técnico da empresa, e Antonio San Juan, xerente en España. A visita
destes profesionais, informa o CITIC, coincide no tempo co remate da
primeira fase do proxecto Henson, un feixe de recursos para a
conectividade no fogar baseados en Fibra Óptica Polimérica, POF,
que, entre outras cousas, permite instalar redes de datos, tanto en
casas de nova construción como noutras xa existentes, de xeito
rápido e seguro.
Os equipos Henson da firma suíza, engade o
CITIC, achegan unhas taxas de consumo enerxético moi reducidas, e
precisan de pouco espazo para o seu funcionamento, todo isto coa gran
vantaxe de que posibilitan a conexión de todo tipo de dispositivos
no fogar, tanto sen fíos como con cable. Incorporan, entre outras
cousas, un conmutador ethernet de
alta velocidade como puntos de acceso Wi-Fi compatíbeis cos últimos
estándares. “Mentres”,
engaden dende o CITIC, “toda a
interconexión entre aparellos e o acceso a Internet canalízase por
unha rede de fibra óptima de polímeros que se pode tender de xeito
rápido e económico polas canalizacións interiores xa existentes na
vivenda e sen risco de interferencia ou de radiación ou mesmo de
descarga eléctrica”. Neste
senso, a rede POF ofrece un bo número de vantaxes, tanto para o
acceso á Internet de alta velocidade como para distribución de
televisión e telefonía sobre IP, “eliminando
se o desexamos a necesidade de contar con múltiples cableados e
facilitando a modernización das vivendas xa construídas”.
O software de control que subministra o CITIC, desenvolvido na súa
Área
de Media en Rede e Fogar Dixital, supervisa o funcionamento de
tódolos equipos POF en tempo real, permitíndolle ao instalador a
configuración e xestión de toda a rede e asegurando a distribución
de tódolos tráficos clasificándoos segundo os tipos e prioridades.
Asemade, fixa a infraestrutura de base a definición de servizos de
valor engadido dentro do fogar dixital.