O CITIC concorre en 10 proxectos presentados á nova edición de Innterconecta con máis de 40 firmas
martes, 9 de abril do 2013
- Bertha Guijarro, coordinadora do centro de I+D emprazado no Campus de Elviña
Seguimos a falar da
segunda entrega do programa FEDER-Innterconecta, logo do reconto de
participación galega (119 proxectos presentados e máis de
cincocentas empresas aspirantes)
levado a cabo hoxe pola Consellería de Economía. Entre as
entidades que están amosar máis actividade ao abeiro do devandito
programa está o Centro de Investigación TIC da Universidade da
Coruña (CITIC), que
participou na convocatoria galega dos ditos fondos (edición 2013) en
10 proxectos, cun importe medio superior a 2 millóns de euros.
Lembrar que estes recursos, xestionados polo CDTI en colaboración
coa Axencia Galega de Innovación da Xunta de Galicia, buscan
promover grandes proxectos integrados de desenvolvemento experimental
e investigación industrial en áreas estratéxicas para impulsar a
I+D+i na Comunidade.
O CITIC asinou para esta
convocatoria un total de 22 contratos con empresas. Xunto ao CITIC
nestes consorcios, que mobilizan máis de 20 millóns de euros,
participan máis de 40 firmas e “en varios deles é o único
Organismo Público de Investigación”, informan fontes do
CITIC.
Este programa
europeo-galego promove, como lembraremos, a cooperación entre
empresas e organismos de investigación, polo que ten como requisito
que cada consorcio beneficiario deberá contar cun mínimo de tres
empresas e unha participación mínima dun 15% dun Organismo Público
de Investigación. As propostas de resolución definitivas
publicaranse a través do CDTI e da Xunta de Galicia.
O CITIC participa nesta
convocatoria a través das súas áreas tecnolóxicas en liñas de
especialización nas que os seus investigadores son expertos, como
Intelixencia Artificial, métodos de usabilidade, comunicacións sen
fíos, sensorización, visión artificial, sistemas de información
xeográfica, sistemas de recomendación, media en Rede e Fogar
Dixital, sistemas distribuídos e matemática (estatística e
investigación operativa). Entre os sectores nos que inciden os
proxectos presentados inclúense os seguintes: saúde, naval,
eficiencia enerxética, automoción, ferroviario e novas tecnoloxías
da información.
Axudas do programa de consolidación e estruturación de unidades de investigación competitivas: Agrupación Estratéxica CITIC. Cofinanciado por::