O COETG revela os premiados da XIV Noite Galega das Telecomunicacións
venres, 13 de novembro do 2009
- Ángel Viña (Denodo Technologies) elixido Enxeñeiro do Ano
Os encargados de organizar a Noite Galega
das Telecomunicacións e da Sociedade da Información deste ano, que celebra xa a súa XIV edición da man, unha vez máis, do Colexio Oficial de Enxeñeiros de Telecomunicación de Galicia, escolleron de novo a Illa da Toxa para citar ás personalidades máis destacadas do sector das Novas Tecnoloxías da
Información e a Comunicación para dar conta, entre todos, do que está a dar de sí a Televisión Dixital Terrestre no noso país, e da súa repercusión económica e social.
Esta gala, que tamén ten como obxectivo fomentar as ligazóns entre
os profesionais deste eido e asentarse como marco para recoñecer o traballo daquelas persoas que máis teñan salientado dentro da promoción tecnolóxica dende ámbitos diversos de actividade, vai premiar como Enxeñeiro do Ano ao presidente de Denodo Technologies, Ángel Viña Castiñeiras, polo seu labor profesional como enxeñeiro de telecomunicación ao
longo dos últimos anos, así como polo seu decisivo labor na
implantación da Demarcación Territorial do Colexio Oficial de Enxeñeiros de Telecomunicación en Galicia
(COETG), a súa dedicación como primeiro decano do COETG e a súa traxectoria profesional como catedrático na Universidade da Coruña e como empresario do sector TIC galego con proxección internacional.
- Rafael Valcarce será recoñecido coma Socio de Honra da AETG
Pola súa parte, Rafael Valcarce Baiget,
presidente de AETIC-Galicia e director de Arteixo Telecom, convértese nesta edición da Noite en Socio de Honra da AETG, distinción do COETG e a AETG para premiar as personalidades destacadas no apoio e na promoción
das telecomunicacións.
As Xuntas
Directivas de ambas entidades valoraron
como razóns determinantes deste recoñecemento “o seu liderado en canto ao compromiso que mantén co desenvolvemento
industrial das ETIC en Galicia, a súa aposta por un sector galego ETIC forte e
unido, así como pola súa ampla traxectoria profesional e o seu labor e esforzo
ao fronte da empresa Arteixo Telecom”.
O Premio ao Mellor
Proxecto TIC con Beneficios Sociais correspóndelle
nesta ocasión ao
Sistema de navegación por Internet coa Voz, deseñado e programado por
José Antonio Vidal Sampedro, que entre as múltiples vantaxes que presenta, figuran a de non
precisar de ningunha instalación previa no ordenador do usuario, máis alá dun
micrófono, e que tamén funciona en teléfonos móbiles. Esta ferramenta está pensada
especialmente para invidentes ou persoas con mobilidade reducida ao facilitarlles
o manexo e acceso ás novas tecnoloxías. A aplicación conta ademais coa cualidade
de ser bidireccional, de xeito que o usuario tamén pode escoitar respostas ás accións
que leva a cabo mediante a súa voz.
Ademais dos
devanditos recoñecementos, o COETG-AETG fará entrega do Premio á
Mellor Aplicación TIC á empresa Sound of Numbers polo
seu proxecto Son Architect, e do Premio
Ingeniero Gerardo García Campos á Mellor Iniciativa Empresarial
TIC á empresa Desarrollo Digital Galicia, S.L.polo proxecto
www.mariscodigital.com e www.videopedido.com, unha
iniciativa valorada pola aplicación das novas tecnoloxías a sectores
tradicionais da nosa economía e polo seu carácter emprendedor e innovador.
Asemade, nesta
edición tamén se fará entrega dun novo galardón, o Premio Gradiant á
Mellor Tese Doutoral
aplicada ao sector TIC ao enxeñeiro
de telecomunicación Daniel González Jiménez pola súa tese Improvements
in Pose Invariance and Local Description for Gabor-based 2D Face Recognition, distinción que
recoñece aqueles proxectos de investigación emerxentes no ámbito das tecnoloxías da información e da
comunicación.
No tocante ao Premio Gradiant á Mellor Tese Doutoral
aplicada ao sector TIC o xurado valorou
como razón determinante desta distinción a calidade técnica do traballo relacionado
coa implantación dos sistemas de recoñecemento facial biométrico en contornos
realistas, as súas aplicacións prácticas e o uso da tecnoloxía na industria e
da transferencia de coñecemento ao sector das TIC.
Ademais da
entrega dos Premios Galicia das Telecomunicacións, A Noite Galega da Telecomunicacións
e da Sociedade da Información, organizada polo Colexio Oficial de Enxeñeiros de
Telecomunicación de Galicia (COETG) e presidida polo xefe do Executivo
galego, Alberto Núñez Feijóo, versará sobre a Axencia Estatal de Radiocomunicacións
a través da proxección dun audiovisual que exporá a candidatura e os méritos de
Galicia para converterse na sede da tamén chamada Axencia do Espectro.
Unha vella
demanda do Colexio Oficial de Enxeñeiros de Telecomunicación de Galicia que busca
sumar os apoios da Administración, do tecido empresarial e da sociedade galega.