O GPUL organiza a vindeira semana a II edición do HackUDC

A vindeira semana, do 16 ao 18 de febreiro, a Facultade de Informática da Coruña acollerá a segunda edición do HackUDC organizado polo GPUL (Grupo de Programadores e Usuarios de Linux). Está prevista a asistencia de máis de 160 participantes nun encontro no que aplicarán o seu coñecemento para crear novos proxectos innovadores no ámbito do desenvolvemento de software.
Así, ao longo de tres días, os equipos formados por estudantes de toda España darán vida ás súas ideas e proporán novos sistemas e proxectos, sempre baixo unha licenza de software libre, para resolver unha serie de retos. Estes retos serán propostos polas empresas patrocinadoras, que van desde empresas locais até multinacionais do sector tecnolóxico.
Este ano, o HackUDC conta co patrocinio de empresas de renome a nivel nacional como Relacione, BizAway, Gradiant, Disashop ou Inditex, entre outras, ademais da colaboración da Facultade de Informática da Coruña, a Universidade da Coruña e a Axencia para Modernización Tecnolóxica de Galicia (AMTEGA). A listaxe total de patrocinadores pode consultarse na web do encontro.
O Grupo de Programadores e Usuarios de Linux (GPUL), con 25 anos de traxectoria e máis de 500 membros, é a entidade que se atopa detrás de HackUDC. Dende GPUL queren fomentar o uso e desenvolvemento de software e hardware libre, amais de promover a colaboración dentro da comunidade de desenvolvedores.