Os gañadores dos Premios INCUVI-Emprende por Pontevedra incorpóranse á sede local de AJE
xoves, 26 de marzo do 2015
Tamén houbo gañadores
da cuarta edición dos Premios INCUVI-Emprende (Universidade de Vigo)
polo Campus de Pontevedra, trátase de catro empresas co nexo común
da innovación que veñen de comezar xa, oficialmente, a súa andaina
nos espazos de emprendemento da sede de AJE (Asociación de
Empresarios Novos). Estamos a falar, máis polo miúdo, de dúas
iniciativas gañadoras e outros dous proxectos distinguidos cun
accésit. As catro propostas disporán dun espazo no que
desenvolverse ao longo dun ano. A súa chegada a AJE materializouse coa entrega das chaves de dous dos
despachos do espazo para emprendedores da sede da asociación e máis
da sala de coworking que ocuparán os seleccionados cun
accésit. Falamos dos seguintes proxectos: Beltaine, Atec
Creative Solutions, E-Natura e Cervexa Artesá.
Sobre a conserveira
Beltaine, sinalar que vén da man de Xosé Rial, Pilar Varela,
Alfonso Villanueva e Pablo Argibay. A súa intención é “darlle
unha volta ao concepto da conserva e convertela nunha experiencia”.
Intentar levar a alta cociña a este tipo de produtos é o obxectivo
central dunha iniciativa que agardan “poder sacar adiante” na súa
estadía nesta incubadora, dado que “na nosa área os contactos que
se podan xerar grazas a iniciativas como esta son indispensábeis”.
No que se refire a
Atec, informar que vén da man dunha estudante de doutoramento da
Facultade de Belas Artes, Tania Pérez, e que trata de propor un
“binomio entre imaxe e tecnoloxía”, no que a creatividade e a
innovación vaian da man. A iniciativa, nas súas palabras, diríxese
a “apoiarse mutuamente nestas dúas disciplinas” tanto para
ofrecer unha serie de servizos a particulares e PEME, “como para
desenvolver as nosas propias aplicacións”. A emprendedora tamén
adiantou que arestora está a traballar nun panel de xestión para
inmobiliarias.
Amais dos proxectos
devanditos, no espazo de coworking de AJE asentaranse
E-Natura, unha empresa que ten como piares as enerxías renovábeis e
a enxeñaría forestal, e Cervexa Artesá, un proxecto no que un
grupo de titulados dos Campus de Vigo e Ourense estudarán as
posibilidades de poñer en marcha “un centro de produción e
investigación” sobre esta bebida.