Os morcegos galegos teñen un novo curruncho na web

Grazas ao apoio económico da Fundación Barrié a través do Proxecto HIPPOS, o programa Morcegos de Galicia vén de renovar por completo a súa páxina web para amosar dun xeito atractivo información sobre os seus proxectos, actividades, cursos prácticas, os morcegos presentes en Galicia (con referencia á información biométrica e ecolóxica obtida na nosa comuniadde) e un Atlas dos Morcegos de Galicia no que poder consultar a información sobre a distribución das especies presentes no país. Non falta información sobre o xeito de colaborar con esta interesante iniciativa que busca a conservación dos morcegos.
Detrás de Morcegos de Galicia está a Asociación DROSERA para o Estudo e a Conservación do Medio Natural, que consciente da importancia na dinámica dos ecosistemas dos morcegos e a vulnerabilidade das súas poboacións emprendeu o programa Morcegos de Galicia no ano 2008, para aglutinar todas as iniciativas de investigación, conservación, divulgación e sensibilización sobre os morcegos que levan a cabo, e que agora poden coñecerse mellor grazas á súa nova páxina web, obra da empresa carballesa Abertal.