Vigo acolle o día 28 o primeiro editatón da Galipedia
martes, 20 de xaneiro do 2015
GALPon
vai organizar o vindeiro 28 de febreiro unha actividade de especial
interese para os nosos docentes máis afeitos a botar man da Internet
para complementar os contidos da clase e, tamén, para mellorar a
formación do alumnado en materia de acceso ao coñecemento. Máis
polo miúdo, do que se trata é de abrir novos horizontes de
participación e interacción para os docentes que botan man da
Galipedia, a Wikipedia en galego. A convocatoria do 28 (o
primeiro editatón da Galipedia) contará precisamente coa
colaboración dos administradores da Galipedia, que exporán ante os
asistentes diversos xeitos de colaborar coa iniciativa. Por exemplo
na edición de artigos.
A idea, tamén, é expor as vantaxes de investigar
para a enciclopedia galega e os métodos para facelo. Na xeira de
traballo, sinala GALPon no seu convite ao profesorado galego,
“poderemos aprender xuntos como participar na creación de artigos,
asesorados por usuarios experimentados, ao tempo que axudamos a que
medre o coñecemento dispoñíbel para todo o mundo, na nosa lingua”.
O obradoiro ten tamén a intención de explorar as
posibilidades de incorporar a documentación da Galipedia nas nosas
aulas, “polo que intercambiaremos ideas e experiencias que poidan
darlle ao noso alumnado a oportunidade de ser non só usuarios, senón
participantes activos e creadores do patrimonio cultural e libre da
humanidade”, engaden os organizadores da xornada, que por certo
vaise celebrar na Residencia Altamar de Vigo.