A Tecnópole e a Fundación Barrié unen forzas para achegar a I+D a 8.000 estudantes galegos

A Tecnópole, o Parque Tecnolóxico de Galicia, ten unha ampla tradición en accións divulgativas relacionadas coa ciencia, a I+D e as vantaxes das novas tecnoloxías nos eidos investigador ou empresarial. A actividades como Galiciaciencia e precedentes, cómpre engadir cursos en liña para os profesionais galegos ou xornadas para afianzar ás empresas residentes nos segredos da Rede 2.0. A cuestión divulgativa do parque (que é en si mesmo un foco de información), lonxe de esmorecer, suma e segue. Así nolo conta estes días na súa web a Tecnópole, que ombro con ombro coa Fundación Barrié vai organizar durante os vindeiros catro meses unha serie de eventos científicos para 8.000 estudantes.
As actividades, que se insiren no programa Espectáculos de ciencia, desenvolveranse por toda a nosa xeografía, poñendo de relevo a vontade da Tecnópole de tirar abaixo as súas propias barreiras e facer, na medida do posible, que actividades como a Semana da Ciencia, na que participa arreo o parque tecnolóxico, pasen a abranguer todo o ano. O primeiro dos espectáculos titúlase Ciencia ou ficción e celébrase estes días en Ourense con dúas sesións e repetirase en breve en Lugo, Santiago, A Coruña e Pontevedra.
Ata o mes de maio celebraranse outros tres espectáculos diferentes que tamén viaxarán a Ferrol e Vigo, todos eles cofinanciados pola Consellería de Economía e Industria.
A iniciativa, conta a Tecnópole, supón o inicio do programa de accións de celebración do 20 aniversario do parque e insírese na liña de actuación de desestacionalización das actividades de divulgación científica contemplada no Plan Galego de Investigación, o i2C, que ten como obxectivo promover a celebración de actividades de divulgación á marxe da Semana da Ciencia.
Os Espectáculos de ciencia, engaden fontes da Tecnópole, “supoñen un reto porque implican levar por primeira vez a súa actividade divulgativa a localidades de toda Galicia”. As sesións están dirixidas a estudantes de Secundaria, Bacharelato e Ciclos Formativos, adaptándose en cada caso os contidos ao nivel académico dos asistentes. O obxectivo é o seguinte: “Levar a ciencia da maneira máis didáctica e amena aos máis novos; ao longo dos 50 minutos que dura cada sesión, os asistentes participan en experiencias espectaculares que son o vehículo para introducir conceptos científico-tecnolóxicos”.