A Radio Galega afondará no dominio .gal este sábado

O programa Banda Ancha da Radio Galega, galardoado hai poucos meses co Premio Especial EGANET, contará este sábado coa presenza de Edita de Lorenzo, directora da Escola de Enxeñaría de Telecomunicación e vogal da Asociación PuntoGal, que aproveitará a celebración do Día das Letras Galegas e do Día Internacional das Telecomunicacións e da Sociedade da Información para dar conta dos anuncios realizados onte co gallo da posta en funcionamento da primeira páxina web creada baixo o dominio .gal, á vez que tamén realizará algún comentario sobre os estudos en Telecomunicación que se imparten en Vigo.
Edita de Lorenzo comentará os prazos e requisitos para o rexistros de páxinas web baixo o dominio .gal, que nos vindeiros meses vai supor toda unha revolución para a sociedade galega na Internet, contribuíndo a potenciar a nosa presenza na Rede, e instando non só á adopción do novo nome de dominio dende espazo xa existentes, senón tamén á creación de novos contidos para aproveitar as novas posibilidades que permite esta fiestra que dende a Internet se abre á nosa sociedade.
O programa tamén contará con Juanillo Esteban, coñecido entre outras cousas por dar voz ao Xabarín da TVG, quen compartirá coa audiencia os seus primeiros contactos coa tecnoloxía e o uso que fai actualmente da mesma. O espazo radiofónico completarase cunha breve entrevista con Carlos Pérez, da compañía coruñesa Cleventy, para comentar o lanzamento da aplicación EcoLuz, que permite consultar dun xeito áxil os prezos do subministro eléctrico a cada hora, para así poder planificar as nosas tarefas domésticas de maior consumo para minimizar os gasto neste concepto que cada día resulta máis gravoso para as economías familiares.