Desenvolven no Campus de Ourense unha plataforma contra as páxinas lixo que se coan nos buscadores

O enxeñeiro informático Jorge Fernández vén de desenvolver, para a súa tese de doutoramento presentada no Campus de Ourense, unha investigación para a mellora das plataformas de filtrado existentes. O seu traballo diríxese en boa medida a botarnos unha man, tanto a nós os usuarios de a pé como ás compañías responsables das ferramentas TIC de procura, no camiño de chegar a datos de valor, ceibes das páxinas de contido lixo que adoitan interpoñerse nas listaxes de resultados finais. Para a súa tese, Fernández desenvolveu WSF2, unha plataforma que cualifica de “potente e flexible” e que é quen de filtrar as chamadas web spam para “mellorar os sistemas existentes”.
A tese, titulada Intelligent System for Web Spam Detection, estivo dirixida por Reyes Pavón e Rosalía Laza, e foi elaborada no Grupo de Investigación Sing da Escola Superior de Enxeñaría Informática do Campus de Ourense durante catro anos. A investigación, como dixemos, centrouse no chamado web spam, o intento artificial de manipulación dunha páxina web co fin de enganar aos motores de busca e así conseguir emprazarse no máis alto das listaxes de resultados que se proporcionan ao usuario. Segundo explica Jorge Fernández (doutor pola Universidade de Vigo) os investigadores actuais encaran o reto da Rede lixo “como o meirande desafío actual nas buscas web, xa que os motores ven seriamente afectadas as súas operacións por mor deste tipo de páxinas”. O investigador tamén engade que hai estudos recentes que apuntan a que a cantidade de lixo na Internet está a incrementarse “de xeito drástico”, como evidencia o feito de que Google sexa quen de detectar, a día de hoxe, arredor de 9.500 novas web spam cada día, que afectan de 12 a 14 millóns de consultas diarias
Tendo isto como alicerce, na súa tese de doutoramento, Jorge Fernández desenvolveu “un modelo híbrido de intelixencia artificial destinado a solventar o problema da localización e filtrado de dominios web que ofrecen contido ilícito”. O modelo proposto, denominado WSF2, integra e aplica un sistema baseado en regras, que vai a ser o encargado de xestionar e executar os distintos algoritmos de clasificación incorporados ao sistema. Segundo explica o investigador, “este conxunto de regras constitúen a base de coñecemento, que será utilizada polo modelo deseñado á hora de determinar a lexitimidade dun dominio web”. A maiores, o modelo incorpora un módulo de aprendizaxe “capaz de axustar automaticamente os parámetros de configuración, permitindo desta maneira manter o rendemento de filtrado ao longo do tempo”. Para este fin, o modelo foi desenvolvido botando man dunha metodoloxía IBR, “de razoamento baseado en instancias”.