Vigo acolle esta semana presentación de SmartPEME

A Deputación de Pontevedra vai presentar esta semana en Vigo o seu programa SmartPEME para a capacitación dixital das nosas empresas, autónomos e profesionais. O programa (unha versión optimizada da antiga rede CPAE 2.0, máis próxima á sociedade e aos concellos) será dado a coñecer en todos os seus detalles no antigo Reitorado da Universidade de Vigo, este xoves 22, a partir das 10.00 da mañá. Segundo informa a Deputación, o período de inscricións nesta xornada continúa aberto e todas as persoas que queiran asistir poderá reservar a súa praza enchendo un formulario que poderán atopar a través dun banner no inicio da páxina web da Deputación de Pontevedra. Na xornada estarán presentes a presidenta da entidade provincial, Carmela Silva, e o alcalde de Vigo, Abel Caballero. Tamén acudirá o experto en estratexia dixital Luis Ferrándiz, de KPMG Asesores.
Como lembraremos, StartPEME foi posto en marcha oficialmente o pasado mes de xuño, aínda que a súa actividade foise deixando notar, xa, dende comezos do ano. Nos seus primeiros tres meses “oficiais” de actividade, xa foi quen de atender a máis de 200 pequenas e medianas empresas da provincia de Pontevedra: realizáronse e resolvéronse 301 asesoramentos de 211 empresas e, ademais, desenvolvéronse 58 eventos de capacitación TIC aos cales asistiron 439 persoas.
O proxecto SmartPEME, en palabras da Deputación, é “un novo modelo de servizo orientado á mellora competitiva das pequenas e medianas empresas e á procura dunha melloría nas vendas e na eficacia e eficiencia das tarefas, que abre novos eidos de actuación e abrangue novos grupos de interese coma os e as emprendedoras, as asociacións empresariais e os axentes de dinamización en concellos”. Todo a través dun uso intensivo das Tecnoloxías da Información e da Comunicación (TIC) e as novas tecnoloxías (redes sociais, comercio electrónico…).
SmartPEME conta con oficinas de seu no Porriño, Cambados, Pontevedra, Lalín, Ponteareas e Vigo. Ao longo desta tempada, esta rede está a acoller itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores, identificación e difusión das necesidades TIC aos provedores de solucións para as PEME e, tamén, impulso de novas carteiras de servizos de asesoramento.