A Deputación de Ourense aproba o programa de eAdministración

A Deputación de Ourense está a dar novos pasos en materia dixital. En termos máis concretos, amais de achegar cumprida información sobre o programa da terceira edición do evento ICC Week, o pleno de Goberno (o correspondente ao mes de marzo) vén de aprobar o programa provincial de Administración Electrónica. Trátase, máis en detalle, do Programa provincial de cooperación cos concellos de menos de 20.000 habitantes para o co-financiamento da subministración de licenzas dun sistema integral de xestión electrónica de procedementos administrativos (2017/2018), iniciativa para a cal a Deputación de Ourense destinará un orzamento de 296.208 euros en 2017 e 444.312 euros no exercicio de 2018.
Segundo fixo saber a entidade que preside Manuel Baltar, a contía económica que a Deputación de Ourense concederá para este fin “dependerá do número de habitantes dos concellos”. Ou sexa, a contía co-financiará un 90 % aos municipios de menos de 1.000 habitantes, un 70 % aos de entre 1.000 e 2.000 habitantes; un 50 % aos de entre 2.001 e 5.000 habitantes; un 30 % aos de 5.001 e 10.000 habitantes, e un 20 % aos de máis de 10.000 habitantes. O prazo de presentación para adherirse a este programa será desde o día seguinte á publicación das bases no Boletín Oficial da Provincia e ata o 19 de xaneiro de 2018.