React e Redux e as súas potencialidades para lograr os mellores produtos TIC centran un novo obradoiro de Vitae

Entre os principais recursos dos que podemos botar man para acadar os mellores resultados en desenvolvemento de software atópanse sen dúbida React e Redux, dúas librarías completas e avanzadas que nos axudan (e moito) a crear interfaces de usuario e máis controlar o estado das nosas aplicacións, introducindo factores importantes de facilidade, eficacia e simplicidade. En base ás súas grandes vantaxes, existe unha demanda cada vez maior entre os nosos profesionais do desenvolvemento para atopar formación avanzada que lles permita tirarlles o máximo proveito. Para atender esta demanda, a consultora galega Vitae convoca regularmente o seu Curso React e Redux: Desenvolvemento frontend moderno. Para quen queira introducirse ao máximo nas ditas ferramentas, o obradoiro chegará este mes de xuño á súa quinta edición, na Coruña (Hotel Attica 21) os días 1, 2, 8 e 15.
Unha vez máis, o obxectivo da actividade formativa é achegarnos os recursos precisos para lograr os mellores resultados nos acabados finais dos nosos produtos TIC, produtos dinámicos, flexibles, con capacidade de evolución, doados de xestionar e de testar.
Segundo informa Vitae, React é unha libraría Javascript para construír interfaces de usuario que nos facilitan ao máximo a creación de compoñentes personalizados. A maiores, sinala a consultora, “é extremadamente eficiente e flexible” e ten capacidade para afacerse a novas contornas e necesidades. Por outra banda, atesoura recursos para xestionar a vista e os seus estados de xeito sinxelo, “o que incrementa a produtividade no desenvolvemento de aplicacións”.
Respecto da súa orixe, React foi materializada e mantida por Facebook, e arestora é unha ferramenta en proceso de rápido espallamento. Está a ser empregado pola devandita rede social e por outras de primeiro nivel como Instagram, Netflix, Paypal, Imgur, Feedly ou Airbnb. Por outra parte, é código aberto, polo que conta con respaldo de desenvolvedores de todo o mundo, garantindo o seu bo funcionamento e a súa axeitada evolución.
Redux, pola súa banda, é un contedor de estado que funciona de maneira preditiva e que nos axuda a xestionar o estado dunha aplicación cando esta incrementa a súa complexidade. En parte foi posta en funcionamento por Flux, que é o patrón de arquitectura de aplicación que empregan Facebook e outras moitas compañías no desenvolvemento de aplicacións React.
“Neste curso”, explican dende a consultora, “o alumno aprenderá a empregar estas tecnoloxías, xunto con outras como o xestor de paquetes de Node (npm) e Webpack para aumentar a súa produtividade ao ser quen de desenvolver aplicacións modernas que sexan flexibles e sinxelas de manexar, manter e probar”.
Este obradoiro insírese na estratexia de Vitae a prol de mellorar a formación e capacitación dos nosos profesionais e empresas no sector das novas tecnoloxías da información, centrándose na mesma medida nos aspectos humanos e organizativos que nos aspectos tecnolóxicos.
O encargado de impartir estes contidos será Félix Horro Pita, enxeñeiro técnico en Informática e profesional con máis de 13 anos de experiencia como programador na empresa Corunet, amais de co-desenvolvedor de grandes proxectos para empresas do talle de Inditex, Abanca ou BricoKing.