WhatsApp podería deixar de operar en Reino Unido

Nun momento no que se está a falar do bloqueo de TikTok nalgúns países por considerar que a aplicación podería non protexer suficientemente os datos dos usuarios ante inxerencias do Goberno chinés, resulta bastante sorprendente que poida sucede case o contrario, xa que o máximo responsable de WhatsApp, Will Cathcart, asegura que non reducirán a seguridade das mensaxes dos seus usuarios aínda que o solicite o Goberno británico, o que podería levar á prohibición de WhatsApp no Reino Unido.
Estas afirmacións de Cathcart chegan en apoio a Meredith Whittaker, presidenta de Signal, quen asegurou antes que Signal deixaría de operar en Reino Unido se obrigaban por lei á análise das mensaxes dos usuarios.
Cómpre lembrar que tanto Signal como WhatsApp fan uso de cifrado de extremo a extremo, ou sexa, que as compañías responsables destas plataformas de mensaxería non poden acceder aos contidos das mensaxes dos usuarios, e queren que as aplicacións continúen a operar así, pese a que en Reino Unido estean a promover unha lei que obrigue ás plataformas que permiten a mensaxería privada cifrada que adopten tecnoloxía para a detección e o borrado de material de abuso infantil.
Aínda que introducir tecnoloxía que puidese detectar pornografía infantil é unha demanda que parece razoable, o problema é que supón a redución da seguridade do sistema, e unha vez establecido podería perverterse completamente, xa que cada país (incluíndo réximes autoritarios) podería indicar os contidos contra os que habería que actuar, o que podería levar a censura e mesmo a control da poboación e identificación de disidentes, facendo cómplices ás ferramentas de comunicación de medidas que poderiamos considerar contrarias aos dereitos humanos.
WhatsApp e Signal non queren converterse en ferramentas de vixilancia masiva da poboación, pero tamén queren evitar o uso de tecnoloxías polémicas. Lembremos que Apple chegou a realizar probas cunha tecnoloxía de detección de pornografía infantil que se executaba directamente os dispositivos dos usuarios, e finalmente suspendeu a súa aplicación, dando a impresión de que non veremos nada semellante no futuro por terse considerado de xeito maioritario que era un atentado contra dereitos fundamentais.