X leva máis dun mes fóra do Brasil por mor dunha resolución do Tribunal Supremo en resposta á desobediencia da compañía de Elon Musk ante distintos mandatos xudiciais e a retirada da súa representación legal no país, pero finalmente X someteuse á lexislación brasileira e aceptou pagar as sancións determinadas polas súas infraccións.
O pasado venres X comunicou ás autoridades que realizara o pagamento das multas, aínda que inicialmente non se puidera constatar a operación porque dende X fixeron o ingreso dos 28,6 millóns de reais (4,7 millóns de euros) nunha conta bancaria diferente da especificada no procedemento xudicial. A Secretaría Xudicial do Tribunal Supremo ten agora que certificar a regularidade do depósito de cara á Procuradoría Xeral da República, formalizando a operación, tras o que se prevé o levantamento total do bloqueo de X no Brasil.
Un brasileiro tamén podería ter que pagar multas
Pero cómpre lembrar que o bloqueo de X no Brasil non afectaba só á compañía e aos operadores de telecomunicacións, senón tamén aos cidadáns, que tiñan prohibido empregar medidas para saltar o bloqueo baixo penas de sancións diarias de 50.000 reais (8.360 euros), e finalmente este tipo de multa vai facerse efectiva tras constatarse nun informe da Policía Federal as publicacións en X por parte do candidato á Alcaldía de São Paulo, Pablo Marçal.
O maxistrado Alexandre de Moraes chamou a declarar a Pablo Henrique Costa Marçal por mor da súa conduta, considerada un «uso indebido dos medios de comunicación» e unha «afronta á lexitimidade e normalidade do proceso electoral», polo que o candidato non só podería ter que facer fronte a unha multa económica, senón que incluso podería ser considerado inelixible nos comicios electorais.
Marçal leva publicando en X dende o 24 de setembro, infrinxindo as ordes xudiciais, e dando difusión a información entre as que non faltan documentos claramente falsificados, práctica que xa lle valeu a suspensión de contas secundarias en redes sociais, abertas tras a suspensión de todas as súas contas oficiais (deixando claro que non estamos ante unha persoa moi respectuosa coas normas das plataformas sociais). Tamén é salientable o seu pasado delituoso, xa que Marçal foi condenado a máis de catro anos de prisión por roubos realizados mediante malware (pero conseguiu librar da cadea por prescrición da causa).
