Os novos emprendedores de Inicia Coworking Lugo participan nunha camiñada pola cidade

Este mércores, os 22 participantes da segunda fase de Inicia Coworking (plan de apoio de balde ao emprendemento innovador impulsado polo Concello de Lugo e a Escola de Organización Industrial, EOI) participaron nunha andaina de irmandade pola cidade, máis polo miúdo polo paseo da beira do río Rato. No paseo-xuntanza tamén concorreu a concelleira de Economía e Emprego, Ana Prieto. Segundo fixo saber, foi unha actividade de motivación para fomentar “o espírito colaborativo e o traballo en equipo entre os emprendedores e emprendedoras e aproveitar sinerxias para mellorar as posibilidades de éxito”.
Tamén dixo que este tipo de xornadas e actividades complementarias de lecer foi “unha das cuestións que os participantes pediron reforzar nesta segunda edición do Inicia Coworking”, e ás que xa está a dar resposta o equipo coordinador, formado por traballadores municipais e da EOI.
Como lembraremos, nesta nova etapa do programa están a participar 20 emprendedores, que recibirán durante cinco meses de xeito gratuíto apoio integral, individual e personalizado aos emprendedores e emprendedoras de Lugo para poñer en marcha con éxito a súa empresa, asegurando así a súa viabilidade tanto técnica como económica.
Recentemente o Concello informou da importancia tecnolóxica e innovadora, da calidade e das posibilidades de futuro das dúas ducias de start-ups con presenza na primeira fase do programa (con sede de operacións no CEI Nodus), novas firmas na súa meirande ligadas ás novas tecnoloxías da información e ao turismo.
O Concello tamén fixo saber da posta en marcha da segunda convocatoria do Inicia Coworking e da apertura, o vindeiro ano, de dúas edicións máis, coas que se ofrecerá apoio a outros 40 emprendedores. “Queremos reter en Lugo o talento dos lucenses, que é moito, como fica demostrado con esta iniciativa”, dixo daquela a alcaldesa Lara Méndez, engadindo que nos últimos orzamentos o Concello destinou 5 millóns de euros a iniciativas vinculadas co fomento do emprego.
Colaboración coa EOI
O Concello desenvolve o plan Inicia Coworking en colaboración coa Escola de Organización Industrial (EOI), dependente do Ministerio de Industria. Cun orzamento de 800.000 euros, fornecerase entre este ano e o 2018 de xeito gratuíto a máis de 260 lucenses un apoio integral, individual e personalizado, para poñer en marcha con éxito a súa empresa, asegurando a súa viabilidade tanto técnica como financeira.