Grand Theft Auto VI non incluirá disco nas súas edicións físicas

A apertura das reservas de Grand Theft Auto VI en versións para PlayStation 5 e Xbox Series X|S está a converterse nun momento moi relevante no sector dos videoxogos, especialmente polo feito de que o xogo finalmente non será o detonante nunha suba de prezo dos grandes lanzamento, pero si podería consolidar unha tendencia moi presente en PC que en consolas non é tan habitual: a caixa da versión física non incluirá disco, senón un código de descarga.
Dende Rockstar Games detallan que, aínda que o xogo non poderá executarse ata o 19 de novembro, os usuarios que o adquiran anticipadamente poderán realizar a súa descarga anticipada a partir do 12 de novembro, facilitando así que os compradores poidan gozar de GTA VI dende o primeiro minuto (evitando as colas de descarga do día do lanzamento).
Os compradores anticipados tamén recibirá como recompensa o Vintage Vice City Pack, unha colección de elementos que lembran ao clásico Grand Theft Auto: Vice City, como un sedán Vapid Stanier do 55 e roupa e peiteados decadentes para Jason e Lucía.
O xogo terá unha versión estándar a 79,99 euros, que en reserva tamén inclúe un mes de GTA+ sen custo adicional, aínda que os incondicionais da franquía probablemente opten por facerse coa Ultimate Edition, cun prezo de 99,99 euros, que a maiores inclúe unha colección exclusiva de vehículos premium, armas, moda e acción que irá dosificándose ao longo de cada capítulo da historia de Jason e Lucía.
Un detalle a salientar coa apertura de reservas é que Sony Interactive Entertainment está a insistir na súa colaboración con Rockstar Games para que o xogo ofreza a súa mellor experiencia de xogo en PlayStation 5, xa que o título aproveitará funcións exclusivas da PS5 como a retroalimentación háptica do mando DualSense, o son Tempest 3D para sensacións máis inmersivas e tamén achegará certos toques aproveitando o altofalante integrado no mando.
Confían en que este título sexa un incentivo para adquirir unha PlayStation 5 ou unha PlayStation 5 Pro, xa que non estará dispoñible para consolas da anterior xeración.
Sobre a polémica de que as edicións físicas do xogo non inclúa o título en disco, estamos ante unha medida que non está a ser nada ben recibida polos coleccionistas (pois o xogo perdería o seu carácter coleccionable), pero tamén podería ter unha reacción contraria por parte de moitas tendas, xa que o feito de que o xogo non estea incluído no disco, senón que sexa un código de descarga, elimina a posibilidade da súa venda de segunda man, eliminando así unha das grandes fontes de ingresos de varias cadeas de venda de videoxogos.