Os subscritores de PlayStation Plus poderán descargar sen custo adicional durante o mes de agosto tres novos xogos incluídos na súa subscrición: Dying Light 2 Stay Human: Reloaded Edition, Big Walk e Signalis. Os títulos estarán dispoñibles entre o 4 e o 31 de agosto para as consolas PS5 e PS4 (segundo o caso).
Dying Light 2 Stay Human: Reloaded Edition chega a PS5 e PS4 cunha proposta de acción, aventura e supervivencia ambientada nunha cidade postapocalíptica devastada por un virus que converteu a maior parte da humanidade en criaturas monstruosas. Os xogadores asumirán o papel de Aiden Caldwell, un nómada con habilidades especiais que deberá descubrir a verdade sobre o seu pasado mentres toma decisións que afectan ao destino da cidade. O título tamén permite partidas cooperativas para ata catro xogadores, nas que cada grupo pode experimentar consecuencias diferentes en función das decisións tomadas.
En PS5 tamén estará dispoñible Big Walk, unha aventura cooperativa centrada na comunicación e o traballo en equipo. O xogo propón explorar un amplo mundo aberto cheo de desafíos e quebracabezas que requiren colaboración entre os participantes, empregando diferentes ferramentas para orientarse e comunicarse. Ademais dos obxectivos principais, ofrece un enfoque desenfadado que anima simplemente a compartir a experiencia con outros xogadores.
A selección complétase con Signalis para PS4, un título de terror psicolóxico e supervivencia con estética retrotecnolóxica. A protagonista, Elster, unha técnica Replika, deberá explorar un escenario surrealista mentres busca a súa compañeira e tenta recuperar os seus recordos. A aventura combina exploración, resolución de quebracabezas e enfrontamentos con criaturas nun ambiente marcado pola tensión e a atmosfera melancólica.
Sony tamén anunciou un paquete adicional para os subscritores de PlayStation Plus relacionado con Marvel Tōkon: Fighting Souls, que poderá descargarse a partir do 6 de agosto. O contido inclúe cinco avatares inspirados en personaxes como Capitán América, Tormenta, Spider-Man, Doctor Doom e Ghost Rider, ademais dun conxunto de poses para a pantalla de resultados de vinte personaxes do xogo. O paquete poderá reclamarse a través da PlayStation Store e quedará asociado á conta do usuario para empregarse tanto nos perfís de PS5 e PS4 como no propio xogo unha vez descargado.
