Microsoft está a introducir unha serie de melloras en Windows 11 destinadas a optimizar o uso da memoria RAM e aumentar a capacidade de resposta dos equipos con 8 GB (que continúan presentes comercialmente por mor da actual crise das memorias provocada polo auxe da IA). Os cambios afectan tanto á xestión interna do sistema operativo como ao comportamento de aplicacións habituais, e buscan reducir os atrasos ao abrir programas, cambiar entre tarefas ou recuperar pestanas e documentos que permanecen en segundo plano.
Segundo os datos das probas internas e da telemetría de Microsoft, os equipos con 8 GB de memoria poden conseguir ata un 20 % máis de capacidade de resposta e completar determinadas tarefas de multitarefa ata un 40 % máis rápido. As porcentaxes proceden de escenarios de proba concretos, polo que non representan unha mellora uniforme para todos os equipos e aplicacións.
Unha das principais actuacións céntrase na compresión da memoria. Windows leva anos empregando esta técnica para manter máis datos activos na RAM e reducir a necesidade de recorrer ao almacenamento, que é máis lento. Os novos axustes permiten conservar ata 2 GB adicionais de datos activos na memoria, o que reduce as posibilidades de que unha aplicación ou unha pestana do navegador teñan que cargarse de novo ao recuperalas.
A xestión dos recursos tamén cambia para dar prioridade ás accións que requiren unha resposta inmediata. Abrir o menú Inicio, realizar unha busca, acceder á configuración, utilizar a ferramenta de recortes ou abrir o Explorador de ficheiros pode resultar ata un 20 % máis rápido respecto das versións de xaneiro de 2026. Para conseguilo, o sistema prioriza temporalmente as tarefas solicitadas polo usuario e reduce a actividade de procesos secundarios, como a indexación das buscas.
Microsoft Edge tamén se beneficia destes cambios. Cando o navegador web xa está activo en segundo plano, Windows pode conectarse directamente a el ao abrir unha ligazón ou executalo desde o menú Inicio, sen necesidade de localizalo e inicializalo de novo. Esta optimización pode reducir ata un 33 % o tempo de apertura.
Microsoft Teams incorpora igualmente axustes específicos para os equipos con 8 GB de RAM. A aplicación pode activar por defecto o modo de eficiencia nestes dispositivos, co que consegue reducir o consumo de recursos e acelerar ata un 20 % o seu inicio. Durante as videoconferencias tamén pode adaptar a resolución da cámara para reservar capacidade de procesamento ao son.
Menor consumo de memoria nas aplicacións
As optimizacións tamén afectan ao consumo de memoria de Windows, Edge e Microsoft 365. Nas probas de multitarefa con equipos de 8 GB, os cambios reduciron ata 900 MB o incremento de memoria comprometida. Word, PowerPoint, Excel e Outlook achegan unha parte importante deste aforro, cunha redución conxunta de 360 MB.
Outras aplicacións tamén poden aproveitar as melloras da plataforma. WhatsApp, por exemplo, está a rexistrar unha redución de dous díxitos no consumo de memoria da súa versión para Windows.
Os widgets de Windows pasan a cargarse unicamente cando o usuario os abre nos equipos con 8 GB de RAM ou menos. Deste xeito, evítase reservar arredor de 200 MB mentres permanecen pechados. Edge tamén reduce o tempo que mantén activas as pestanas inactivas: agora pasan ao modo de suspensión tras 15 minutos por defecto, fronte ás dúas horas anteriores.
Microsoft probou estas modificacións nunha infraestrutura de máis de 20.000 ordenadores, con tarefas automatizadas que reproducen actividades habituais como navegar pola web, traballar con aplicacións de Microsoft 365, participar en videoconferencias ou descargar ficheiros en segundo plano. O proceso inclúe tamén cámaras de alta velocidade para medir o intervalo entre unha acción e a súa representación na pantalla.
Máis optimizacións en camiño
Os cambios actuais forman parte dun programa de mellora da calidade de Windows que continuará nos próximos meses. Microsoft traballa nunha compresión da memoria máis eficiente e na reutilización de compoñentes entre aplicacións para evitar que cada unha incorpore os seus propios recursos. Search e Widgets compartirán un motor web, do mesmo xeito que OneDrive e Fotos.
As aplicacións desenvolvidas con WinUI 3, entre elas o Explorador de ficheiros, o Bloc de notas, Paint e a nova busca de Windows, tamén están a recibir optimizacións para reducir o consumo de memoria e acelerar a súa apertura. Ademais, están a colaborar cos fabricantes de ordenadores e procesadores para reducir a cantidade de RAM que o hardware reserva para o seu funcionamento.
A evolución dos procesadores tamén inflúe no rendemento destes equipos. Nunha comparación encargada por Microsoft a Principled Technologies, un Dell XPS 13 de 2026 con 8 GB de RAM conseguiu ata un 94 % máis de rendemento multinúcleo que un modelo de 2021 coa mesma capacidade de memoria. O equipo máis recente tamén ofreceu resultados similares aos dunha configuración de 2021 con 16 GB en probas de procesamento, navegación web, tarefas web con IA e exportación de vídeo 4K. Os resultados corresponden aos dispositivos avaliados e non se poden extrapolar a todos os ordenadores.
Como recibir as melloras
As optimizacións están dispoñibles a través de Windows 11, versión 26H2, compilación 26300.9818 ou posterior. Para comprobar se están dispoñibles, cómpre acceder a Configuración, entrar en Windows Update, activar a opción para recibir as actualizacións máis recentes en canto estean dispoñibles e premer en Buscar actualizacións.
Tamén é recomendable manter actualizados Microsoft Edge, Microsoft 365 e Teams, xa que algunhas das melloras chegan mediante actualizacións independentes das aplicacións ou a través de Microsoft Store.
Microsoft lembra que os 8 GB poden ser suficientes para tarefas cotiás, pero recomenda contar con 16 GB ou máis para actividades esixentes como modelado 3D, edición avanzada de vídeo ou procesamento de grandes volumes de datos.
